Du kiwa kyrchaan wa yoh u chimbynta ha ka Public Hearing ka Meghatop Cement

Ynne ka sngi neiliang ki seiñbhalang wa boon nadooh ka KSU Narpuh Circle, FKJGP, HITO, JWC wa kiwi kiwi de da lai ki cha ka Public Hearing ka Meghatop Cement Ltd. kawa da pynman ha chnong Wahiajer, East Jaiñtia Hills yow yoh laad u pynsñiaw yei pyrchah wow sdang ya kani ka karkhana wa thymme tangwa pyn ha luti da em ki Volunteer kiwa da yang yow khang laad ya ki deiwa ong wa u chah du ar ngut kawi ka seiñ neibhah kam ka chnong ki kyrchaan ki yei wan kani ka karkhana.

Ka seiñ KSU Narpuh Circle da ong ko wa nadooh wa sdang hi ym jooh pdiang ya kam kini ki jait Public Hearing neibhah da sñiawthooh wa da chah pynjæd ka bei ramaw wei nadooh ki sngi wa da lai leh da lai e ki dei thoh cha u Member Secretary ka Meghalaya State Pollution Control Board yow pyrchah joor ya ini i thmu wow sdang sa kawi ka karkhana pynmih khyndaw-bilat ha kani ka chnong.

Da ong leh wa waroh ki karkhana kiwa da mih kam ki tit lyiur da wanrah ki yei dooh nong wa khroo ya ka thaaiñ hadooh wa ki loom ki wah da syllen lut ki, ki um ki wah da jakhlia lut wei daw wiar lut ki ha kawi ka sngi.

I doom daw tymmoh ko ya ka pateiñ yong ngi du nei rhah spah yabor nadooh ki khian hadooh ki heh wei da yoo chwa wa ka pateiñ wow wan da dooh nong chwa ko.

Em kiwa chim kabu ya kiwa yaleh kreh pulit deiwa paan poisa yow yoh kreh

November 21, 2024

Maham u Chairman ka JMB ya ki kari wa lai kit jhep na yung ki bru dep tæ noh kat cha wa yoh

November 21, 2024

Chooh chooh da ong wa i pynman ya kini ki Public Hearing ym man de ko kawa khooid tangwa du wow pyndep rukom neibhah kiwa kyrchaan da yoh ki u psiah katwa kiwa pyrchah ym chah u psiah ki.

Katkam wa pynbna da ka Meghalaya State Pollution Board da khut paidbah cha kani ka Public Hearing yow yoh laad u pynsñiaw yei kyrchaan næ pyrchah, tangwa ym em man ko kamtæ.

Ka seiñ da ong ko leh wa ynne da sñiawthooh lada toor dei bor ym dam u poi chei mynsoo mynsnaam paradoh parasnaam, katwa u mynder rkhai beiñ u yei biej yong i.

Kamtæ da kylli cheiwon ka jaitbru ka thaaiñ u poi ko, sa katwon tylli kini ki Cement Factory ki wow wan kjit ya ka spah wa da booh kyrpang da ki longchwa manchwa deiwa wan ki karkhana wow chim lut yeiwa em wow kamai da ki spah klur wei wow tympra tympiah leh ya ki para chnong da katæ ka ‘Divide and Rule Policy ‘.

Ka seiñ da pynkut ko deiwa ong wa u Blai stat u wow booh ya u Uranium ha South West Khasi Hill wa dang em ki bru wa chemphang wow pyrkhat ya ka mynried ka dong ka thaaiñ waka jaitbru neibhah lada jia wa u Uranium em u ha Elaka Narpuh ka East Jaiñtia, kattæ da khooid ploiñ wa bru wa mrad.