U National Vice President ka National People’s Party (NPP), u Prestone Tynsong da ong u wa pdiang u ya kitu ki bru kiwa pynbaad kiwa kawang moo ya ka NPP, neibhah watwa dang chah kawang moo kattæ ka Party dang khlan ko.
Ka National People’s Party (NPP) ynne da pynman ko ya ka yalang paidbah ha Polo yow pynbna ya waroh ki kyrtong wa daw sai neibynta wow e reiñ ha ka Election MLA kawa daw wan ha ka jylla.
Hawa klam ha kani ka yalang, u Prestone da khyrwait u ya ka All India Trinamool Congress (AITC) kawa em ha ka liang pyrchah ha ka jylla, deiwa ong wa ka Party kawa dang ynnin da dap ka kot khubor tang du da ki Advertisement.
Hajrong i pynmih yong ka Trinamool ya ka Scheme WE Card wow saam mar T. 1000 chi bnai cha ki manbei wa ka MYE Card wow saam T. 1000 cha ki khynroo kiwa ym pu em yoh kaam, u Prestone da ong u wow e ya ka T. 1000 chi bnai ya ki manbei, kam u pa oo sñiaw jem daw u wei da e wyrta u cha ki paidbah wym toh u ngop wei chah pynbiej neibhah ka T. 1000 toh kawa du ha ka haw haw.
Uwa yahkhmat ka NPP da ong u wa lada ka TMC yoo sakhiat ko yei dooh ka jylla ileh e ko katni heithaw wow e hadien ka Election.
