Ka Public Hearing ka Meghalaya Cement Limited kawa pynmih ya ka Topcem Cement wa da pynman ynne ka sngi hajrong i thmu yong ka u tih moochuni ha i tahw wa tip kam i Mooiong Thlusniang wa heh kamwa 26.50 Hectare kawa em ha chnong Chiehruphi, East Jaiñtia Hills District, da man ko kawa lai bait lai ryntih nadooh wa sdang hadooh wa pynkut khlem em iwon iwon i awri awra la hei thaw wa pynman ya ka Public Hearing wa em hajan ka paar moo hi, kamjooh cha lait næ wot ki luti wow lai cha i thaw pynsñiaw paidbah.
Ya kani ka pynsñiaw paidbah da pynman da ka Meghalaya State Pollution Control Board (MSPCB) wei da pynlai da u Environmental Engineer, u Y.F. Laloo chirup i emlang ka J.U. Kharpuri, Additional Deputy Commissioner, East Jaiñtia Hills District, ki paidbah wa chong chnong yong ki chnong wa marjan wa ka Chieruphi kam ka Thangskai, Wahiajer kiwa yahkhmat wa rap bna naam ka thaaiñ Elaka Narpuh wa kiwi de.
U Y.F. Laloo hawa pynche hajrong kani ka Public Hearing ong u, chwa kani ka sngi neiliang ka MSPCB da pyndep ko yei pynbna paidbah wei da pyndep leh ya ki kyndon wa toh u leh katkam ka aiñ, wei ya kani ka Public Hearing leh da pynman katkam ka aiñ Environment Impact Assessment 2006, kawa da pynmih da ka Ministry of Forest & Environment and Climate Change ka sorkar India.
Kiwa chimbynta wow klam ha kani ka yalang paidbah wa kynthup nadooh u Dolloi ka Elaka Narpuh, u Manbha Kyndoh, ki waheh chnong ka Chehruphi, Thangskai, Wahiajer, Tongseng, Brishyrnot, Sunapur deilang wa ki dkhot chnong najrong ki bru wa bna naam ka thaaiñ Narpuh hawa pynsñiaw ki yei kyrchaan hajrong i thmu ka Meghalaya Cement Limited, ong ki i daw wa kyrchaan ki toh wa yoo ki yei roi i paar hapoh ka chnong ka thaaiñ lyngba i wan kani ka Company la heiyatoh i yoh khih yoh kreh ki khon khynroo khyllood ka thaiñ wa kiwi.
Napyrdi ki 12 ngut wa e i klam ha kani ka sngi du uwi donhi wa yieñ u klam pyrchah, utæ toh u Kwillnis Suchiang, General Secretary ka KSU East Jaiñtia Hills District, wei hawa klam pyrchah ong u katkam i yoo yong oo ka Elaka Narpuh da kylla man ko ka khyndaw ka thaw wow kamai spah, ymtoh de ka khyndaw wow chong u sah.
Wei yeini ong wym toh wa klam bichni u tangwa i daw wa pyrkhat u ya ka mynried ki pateiñ kiwa hadien.
Mynjur hi u yei yoh khih yoh kreh, yoh khayi pateiñ tangwa kyntu u wow pyrkhatlang neibynta ka mynried ki khon ki kti.
Neibhah lada ki um ki wah u sngat noh ki, ki sim ki doh ym pah de ki, wei da ka la-ær wa tngit hap u riñ mynsien, heitæ i por ki bru leh ym ye de ki u im u chong u sah.
Da kini ki daw ong u wa kam ka seiñ KSU yieñ skem ko haka yurim u pyrchah yeini neibhah wa da yoo ko yei maa wa da yang.
Discussion about this post