Shillong: U montri wa pait ya ka chait ka khiah u Alexander Laloo Hek da pyntip u wa ka jylla ka duna ko hadooh 129 ngut ki doktor kiwa tip kam ki Specialist, wa kynthup 111 ngut ha ki Hospital wa 18 ngut ha ki CHC.
U Hek da pyntip u wa i emkaam ki Doctor Specialist ha ki Hospital toh 42 ngut ha East Khasi Hills, West Khasi Hills 15 ngut, Ri-Bhoi 3 ngut, ha East Jaiñtia Hills 8 ngut, ha West Jaintia Hills 1, East Garo Hills 7 ngut, West Garo Hills 12 ngut, South Garo Hills 12 ngut wa 11 ngut ha South West Garo Hills. Katwa i emkaam ya ki Doctor ha ki CHC man ko mar 6 ngut ha East Khasi Hills, West Jaintia Hills wa West Garo Hills.
Ya ini u Hek da pyntip u kamwa jubab yeiwa kylli ka MLA na Ampati, ka Miani D Shira ha ka dorbar ynne ka sngi.
U Hek da pyntip u leh wa ka sorkar ka da dep ko wow khut Application na i bynta wow pyndap ya ki tai ki Doctor wa dang duna, tangwa ym em wa thap iwa pynman ya ka sorkar jylla wow ya soi soskular noh wa ka Public Health Foundation of India (PHFI) yow pyndap ya ki Doctor Specialist wa duna.
Ha iwi tawon i liang ha i klam ka liang pyrchah, neiliang u MLA ka Congress, u Himalaya M Shangpliang da dawa u na ka sorkar wa toh u pynchitom ya kitu ki Doctor kiwa ym bien u lai kreh cha kam ki thaaiñ nongkyndong tangwa da pynlai ki da ki Clinic yong ki hi ha Shillong.
Discussion about this post