Hanla ka sorkar Meghalaya da pynlait ko neiwa hap su ya ka Tax næ ka dan wow thied kari wa pynemkaam bordiñ namo ki Electric Vehicles (EVs) tangwa ki bru duna bha kiwa thied ya kini ki jait kari.
Ka sorkar da pynchlur ko ya ki bru wow thied da kini ki EV neibhah wa pynlait ki nei pyntngit ya ka ramaw neibhah wym em pynmih tdem ki kam ki kari wa pynemkaam Diesel næ Petrol.
Khnang wow pynchlur ya ki bru wow thied wei pynemkaam da kini ki jait kari, neiliang ka sorkar jylla da pynman ko yei ya phyllu ynnin ka sngi ha Courtyard Marriot, Shillong hajrong kani ka phang, heiwa u Secretary ka chnat Transport, u DD Sangma da pdiang u wa ki bru ym pu jied ki wow thied ya ki kari Electric.
Ka Electric Vehicles Policy daw kut ko ha u snem wow wan ha u bnai Wisu (Mar) wei hajrong ini ka sorkar kwah ko wow pynsñiawthooh wei pynche cha ki paidbah wow mih chakhmat wow sdang leh ki khih wow chna ya ki kari Electric lada sih ki, u chna ya ki Battery wa kiwi ki tiar kari.
U DD Sangma da ban joor u wa i pynemkaam ya ki kari Electric ym du wow kylliang ko ya kiwa pynemkaam Petrol næ Diesel tangwa daw pynwan dur thymme ya ki thaw wa man sor yow man ki kiwa khooid, kiwa rap duna i ood i sawa wei yow man ka Shillong kawa yahkhmat yeini.
Neiliang won u Assistant Transport Commissioner, u AD Tyngkan da pynsñiaw u wa hei yongsakhiat, ka sor Shillong yahaap bha wow lai da ki kari Electric neibhah wa yajan kawi ka thaw cha kawi tangwa iwa eh toh wa duna ki Charging Station, i wym tip ki bru yei lutphut wa i long i man ki Battery iwa da pyntieñ ya ki bru wow thied ya ki kari Electric.
Ya kani ka yaphyllu da pyman da ka CESL wa ka Ernst & Young LLP deiwa kyrchaan ka Asian Development Bank, heiwa da wan wow chimbynta da ki stat ha kini ki kaam, kiwa dai ya ki kari Electric ha ka thong kammon wow pynman ya ka sor Shillong wow jied ya kini ki jait kari.
Kiwi kiwa klam kynthup ki ya u khlieh ka CESL, u Amit Sood wa kiwi.
Discussion about this post