Ka seiñ Meghalaya Physical Education & Sports Association (MPESA) da lai yachem ko ya u Lahkmen Rymbui, u Montri ka chnat Puræ Puthi yong ka jylla ha kamra krehkaam yong oo ha ka 1 tarik uni u bnai.
Neiliang ka seiñ da yoh ko wow pynsñiaw ya ka yurim wa ka seiñ yieñ ko neibynta wow pynsñiawthooh paidbah yei emkaam ka Subject Physical Education ha ki skur wa ki College. Kiwa da ban khia khamtam ya i myntoi yong kani ka Subject ya ki khynnah puræ wei hei i im yong ki kawa man-ka-sngi. Lyngba kani ka Subject, ki khynnah puræ ye ki wow tip rap bniah wow sñiawthooh chaphang i kordor yong i chait i khiah wa i yoh myntoi lyngba i khlan i doh i pran wa biang.
Ka seiñ da pynsñiaw ko leh wa katkam i pynkrehkaam wa thymme yong ka sorkar bei kawa da pynbna lyngba ka National Education Policy 2020 wei kamjooh leh ka sorkar jylla lyngba ka Meghalaya State Sports Policy 2019 wa ka Meghalaya State Education Policy 2018, da kdaw che wow chim ya ka Physical Education kam kawi na ki Subject kawa emkaam tam ha kani ka juk kawa katni.
Kamtæ, ki dkhot da kyrpaad ki ya u Montri wow kynthup lang noh ya ka Physical Education kam kawi na ki Subject kamwa da leh lang da kiwi ki Board, kitæ ka Central Board of School Education (CBSE) wa ka Indian Certificate School Education (ICSE).
Ki dkhot yong ka seiñ da sñiawsih ki neidaw wa neiliang u Montri da pynsñiaw u wa katni hi, ka sorkar katni dang duna poisa wow pynkrehkaam ya kani ka phang.
