Ka Montri ka chnat i rep i riang ka jylla, ka Ampareen Lyngdoh da pyntip ko wa ka chnat dang yasyllok ko wa ki Scientist ka ICAR wa kiwi ki chnat wow yaleh pyrchah yei kjut ki dieñ kwai khamtam ha thaaiñ Dadenggre, West Garo Hills.
Hawa jubab hajrong iwa kylli wa da wanrah da u MLA ka Dadenggre, u Rupa Marak hapoh ka yung dorbar ynne ka sngi, ka Ampareen da khana ko wa em 8 tylli ki District kiwa chah ktah na ini i kjut ki dieñ kwai.
Da pyntip wa em 209 ngut ki warep kiwa chah ktah ha ka Dadenggre Block wa 406 ngut won ha Rongram Block.
Ka Montri da khana ko leh wa i daw wa yoh kjut kini ki dieñ toh na u kynja khñiang uwa baam ya ki bynta wa dang lung u kwai wei yow yaleh pyrchah yeini, ka sorkar da e hikai ko ya ki warep yow tip ki ki laad ki luti yada.
Ka Montri da pyntip ko wa da e yarap Rs. 6.6 klur cha ki 3005 ngut ki warep kwai kiwa chah ktah nei sih u kwai yow yoh ki u rep da kiwi ki jait mar kam ka ladaw wa kiwi de yow lait ki nei dooh nong.
Neiliang u Lahkmen Rymbui, MLA ka Amlarem hawa yaklam heiyatoh wa ini, da kylli u lada em laad ya ka sorkar wow pynemkaam da ki Drone yow siat dawai na kyndit u dieñ kwai kamwa da hikai da ki stat yow yada nei kjut ki dieñ kwai.
Hajrong ini, ka Ampareen da ong ko wa ka sorkar daw pait ko yeini yow chim ki laad yarap ya ki warep.
Discussion about this post