Uwa yahkhmat ka NPP uwa man leh u Montri ka sorkar jylla, u Rakkam A Sangma da ong u wa i khang baam doh masi ka sorkar Assam daw man ko i kabu ya ka Meghalaya wow booh dukan baam doh masi ha khappood wa ka Assam.
Hawa klam ynnin ka sngi, u Rakkam da ong u wa da bha chiboon ya ki bru ha Meghalaya wow booh dukan doh masi ha Byrnihat, Khanapara, Paikan khnang wa ki bru na Assam u wan baam doh masi ki neidaw wa da khang ha Assam.
“Ha kawi ka liang i khang ka sorkar Assam wow choh doh wei baam doh daw man iwa bha ya ka Meghalaya. Ki nong Meghalaya ye ki wow wai syndon da ki Seven Star Hotel ha ki thaaiñ khappood wa ka Assam, kam ha Byrnihat, Khanapara wa Paikan. Toh u chet ki da i doh masi wa bang bha khnang wa ki bru na Assam u yoh ki wow baam wei lai liwan won cha Assam”, da ong u Rakkam.
Da ong u leh wa i khang baam doh masi da pynsñiawsih wei ktah ko ya kiwi ha kani ka ri laitlooid, heiwa da pynsñiaw u leh wa ym sñiaw yahaap wow khang baam doh masi neidaw wa daw ktah ya kiwi won wei daw wanrah leh yei wym sñiawsuk.
“Lada ka sorkar Meghalaya rai ko katni wa kitu ki bru kiwa wan cha Meghalaya næ Nagaland wa Mizoram toh bait wow baam doh masi, ym ktah mo ya ki paralok Hindu”, da ong u.
Heijooh i por u Rakkam da ong u wa i khang baam doh masi da pynhiar ko yei kyrdan yong ka ri India, deiwa pynrap wa kam ka ri kawa da tip da ka pyrthai, toh u leh em kamwa manlang ha kiwi ha pyrthai.
Kam wow pynkynmoo wa ka sorkar Assam da khang ko wow baam doh masi ha ki Hotel wa Restaurant wei kamjooh ha ki thaw paidbah.
Ini i khang baam doh masi da ka sorkar BJP ha Assam da pynmih ko leh yei wym sñiaw yahaap na kiwa mihkhmat ka jylla Meghalaya wa kynthup na u MLA ka BJP, u Sanbor Shullai wa kiwi ki Montri sorkar.
Discussion about this post