Hadien wa ‘Ka Sur Ki Nong Mawlai’ da pynjoor ko yei yakhih wow dawa na ka sorkar u pyndam kreh chwa chipor ya ki heh pulit wa emkti hei chah siat uwa yahkhmat warim ka HNLC, u Cherish Starfield Thangkhiew, neiliang u Director General of Police, u R. Chandranathan da chim chuti u neidaw samen.
Hajrong ini i e chuti yong ka sorkar ya u heh pulit ka jylla, neiliang u Marbud Dkhar uwa man uwi na kiwa yahkhmat yong ‘Ka Sur Ki Nong Mawlai’ da beiñ joor u yei e chuti ka sorkar deiwa ong wa uwon uwon u sahep uwa dang hap wow chah takit ym ye u wow chim chuti næ wow e daw, kammon ka sorkar ka e chute ko, hei yong sakhiat toh u phah kem pathan ki ya u DGP neibhah emkti u wow siat yap ya u Thangkhiew.
Ha iwi won i liang, da ong u wa wot u Lat ka jylla da pynsñiaw u yei wym sñiaw yahaap hajrong i jia ya u Thangkhiew, tangwa iwa lyngngoh won wa ileh ka sorkar ka dang suki bait ko yei dawa, wei ini ye u man i kaam buit tooh yong ka sorkar wow pynthut yei takit da uwa bichaar.
U Marbud da ong u wa ka sorkar toh u pyndam kreh chwa ko syndon ya ki heh pulit, wa kynthup ya u DGP, u SP ka East Jaintia Hills wa u SP (Traffic) ka East Khasi Hills, lym kamtæ ‘Ka Sur Ki Nong Mawlai’ ym sangeh ko wow pynman yei yakhih neibhah toh ka sorkar kawa bakla.
Neiliang ki dkhot yong ‘Ka Sur Ki Nong Mawlai’ da ong ki wa daw ya phyllu yumut leh wa kiwa ha yung yong u Thangkhiew hachwa wow chim da kiwi ki luti wei lada ka sorkar suki bait ko, daw ujor cha ka Meghalaya State Human Rights Commission (MSHRC) næ cha ka National Human Rights Commission (NHRC).