Ynne ka sngi neiliang u Montri Rangbah ka jylla, u Conrad K Sangma wa kiwi ki Montri ka sorkar jylla da hiar lai pyntngen ki ya ki manyung ha ka chnong Mukroh, West Jaiñtia Hills kiwa da dooh yei mynsien ki dkhot yung hei chah siat ha ki pulit Assam.
Ha kani ka sngi da em leh ka yalang wa tbian hapyrdi ki Montri wa kiwa kitkaam chnong wa kiwa yahkhmat ya ki chnong wa em ha thaaiñ Langam Nongphyllut heiwa ki waheh da pynsñiaw ki yei eh i khor wa chem wa takhooh ki heiyatoh wa iwa jia iwa chem ki ha kani ka thaaiñ.
Ya ka yalang ynne da pynlai da u Chairman ka chnong Mukroh, heiwa da khana wa kani ymtoh ka sien wa nyngkong wa chah thombor chah pyndik ki tangwa da jia i leh da ki hajar sien kattu.
Na uwi na ki waheh na ka thaaiñ da ong u wa ha ka tayaw wa dadep da em ka seiñ niam wa thmu wow lai e dawai mynkna ha chnong Lamarang tangwa du hadien kattu katni por da wan pynsangeh ki pulit ka Assam tangwa deiwa em kiwa wan e dawai tæ lait ki nei mynsoo.
Na uwi u khynroo na ka thaaiñ Block-I da kyrpaad u ya u Montri Rangbah wa waroh ki 36 chnong ha ka thaaiñ wow wanrah noh ya ki hapoh jylla Meghalaya khnang wow ye ki wow im deiwa suk.
Uwi na ki khynroo da kyrpaad u na ki Montri wow booh yaka Police Outpost ha Mukroh khnang wow ye u yada ya ki mynsien wa kordor.
Chooh chooh uwi na ki khynroo da khana u yei eh i khor wa chem ki neipor cheipor heiwa ka sorkar Assam pynkylla ko ya ki pyrtuid wa ki kur yong ki ha ki kot ki sla wei khamtam ha ka EPIC wei manda poi cha Shillong boonsien chah daiñ kuna ki neidaw wym biang ki kot ki sla katkam i pyrtuid.
Da kyrpaad u ya u Montri Rangbah wow yaklam waka sorkar pyrdi wow pynuiñ biang ya ki chnong cha ka jylla Meghalaya lym kamtæ emkaam wow e noh ya ki da ki tiar wow wow yaleh (suloi) neibynta ka yong ki neibhah ymye de ki wow yaichah yeini.
Da khana u wa ha Block-I da chah iehbeiñ bha ko nadooh ki sarok ka luti wei em ki por da hap ki bru wow dih wot da ka um wa dep sum ki.
Chooh chooh da kyrpaad u ya u Conrad wow man u khla ka wait ka jylla wow pynbait yeiwa da lait khamtam hadien wa chah knieh iwa mih na ki hali wa ki bri wei khamtam i chah slaitbor ki khynnah kynthai yong ki.
Hajrong ini neiliang u Conrad da kular u wow chimkhia hakhmat u Montri ki Kaam Pohyung ka ri ha nongbah Delhi.
