Ka Meghalaya High Court ynne da chong bichaar ko ya ka mukotduma PIL wa da yaleh da u Champer M. Sangma uwa ini wa dep da kular wow wanrah ya ki Video yow pynsakhiat wa i tih mooyong pyrchah ya ka aiñ dang pteiñ hi i.
Kamtæ ynne da pynyoo ya ki Video wa em ar bynta wa pynyoo yei tih mooyong pyrchah aiñ kamjooh leh yei kit ya u mooyong wa da tih pyrchah ya ka aiñ ha kiwa boon ki District kam ha West Khasi Hills, South West Khasi Hills, East Jaintia Hills wa South Garo Hills. Hei bynta wa ar won da pynyoo sa ki dur wa chon da u Satellite wa pynyoo ya chiboon ki thaw wa pynhaap mooyong wa dang dep tih.
Hapoh ka yung bichaar da emlang leh u DC ka South Garo Hills uwa da ong wa u mooyong wa da pynyoo ha kini ki Video toh uwa da dep kem wei da khana u leh wa da chimkti u kam u DC dang 6 bnai donhi.
Ka High Court da ong ko wa nadooh wa da pynmih hukum da ka NGT yow khang yei tih wei challan mooyong deilang waka Supreme Court, hadooh katni kiwa leh pyrchah aiñ dang em bait ki deiwa yoo neiwa mih khubor wei uni u mooyong ymtoh ki warim neibhah deiwa pait dei khmat leh da tip toh uwa dang thymme kiwa da noh ha rood ki sarokbah.
Da kdaw yei roi ki karkhana Coke hapoh ka jylla kiwa da krehkaam pyrchah ya ka aiñ deiwa pynemkaam ya u mooyong wa tih pyrchah ya ka aiñ hanla ka sorkar da kam ko wa da dep khang ya kini ki karkhana iwa kopsar ym em leh. Wei da yoo leh lakam wa leh thlah ki bor District.
Da ong leh wa kattu ka High Court la 15 bnai da pynmih ko chiboon ki hukum yow khang ya kini ki kaam pyrchah aiñ tangwa ym em mih soh wei da sooh thied kini ki kaam chadooh ka Assam, kamtæ neibynta i bha i miat ki paidbah boi da toh por u takit da ka Central Bureau of Investigation (CBI) ya ini i kaam hadien wa da yoo ya kini ki sabut wa da wanrah ynne.
Ynne da bichaar leh yeiwa chah maham u Shailendra Kumar Sharma (uwa da yaleh PIL pyrchah ya ki karkhana Coke) ha uwi na ki heh wa pynlai ya kini ki karkhana lada lai u chakhmat wa kani ka mukotduma, kamtæ da phah wow pyntip chaphang ini deiwa e da ka Affidavit yow bichaar biang ha ka 6 tarik uni u bnai wei hadooh u Champer leh da pynsñiaw u yei tieñ hawa yaleh ya kani ka mukotduma.
Hajrong ini da phah ya ki pulit wow yada ya kini wym toh u jia iyi iyi ya ki.
Kamtæ da phah ya ka sorkar wow e jubab ko wa kammon dang ye u chaniah ya ki sahep sorkar hadien wa da yoo ya waroh ki sabut ynne ka sngi wei da laad leh ya uwa yaleh mukotduma wow wanrah chooh ki sabut lada dang em.
Da bichaar leh ya iwa da kam sa uwi wa da chalan tooh hadooh 2 lak MT u mooyong ha kini ki 15 bnai lyngba ka Land Customs Station wa em ha South Garo Hills District heiwa uni u bru wa emkti ha ini i kaam da e daw u boon jait yow dam u wan mih chakhmat heiwa ynne won da ong u wym em chait u.
Neibynta ki Land Custom da yasaaid da u DSGI uwa daw mihkhmat leh ya ka CBI.
Ya kani ka mukotduma daw chong bichaar biang ha ka 13-07-23.
