Kam chibynta wow bichaar ya ki kyndon ka aiñ Narcotic Drugs and Psychotropic Substances (NDPS) Act 1985 yow pait kammon chim kabu kiwa dai wa kiwa pynemkaam drugs ya ki kyndon kani ka aiñ, neiliang ka sorkar jylla da thung ko ya ka Advisory Board ka wow em le dkhot hapoh ka Prevention of Illicit Traffic in Narcotic Drugs and Psychotropic Substances (PIT NDPS) Act 1988 wow yarap yakhun ya i drugs hapoh jylla.
Ya ini da pyntip da u Montri ka Social Welfare Department, u Paul Lyngdoh ynne ka sngi.
U Paul da ong u wa kani na Advisory Board u em ko ya u Retired Justice Shivaji Pandey kam u Chairman, ki muktiar wa da chran namo ki Senior Advocate kitæ u MD Shullai wa u Tsering Yangi kam ki dkhot.
Da ong u wa katkam kani ka aiñ yong u 1988 toh kawa rap khor lada nujor wa ka aiñ yong u 1985 wow yakhun ya u drugs, heiwa ha ka Clause 10 yong ka aiñ toh wow pait ya ki bynta wa ktah i drugs ha ki thaw wa joor i pynemkaam wei dai drugs.
Chooh chooh da ong u wa ka NDPS 1985 kamwa man hi em chiboon i duna wow pynchitom ya kiwa tyngkheiñ ya kani ka aiñ heiwa da yoh ki wow lait suk iwa da pyntlot ya kani ka aiñ.
Da pyntip u wa hadien ki yalang wa u Symbood Montri Rangbah deilang wa ki sahep pulit ka sorkar, da ye ko wow pynkrehkaam ya ka Prevention of Illicit Traffic in Narcotic Drugs and Psychotropic Substances (PIT NDPS) Act 1988 deiwa pynkhor bha.
