Ka kynhun ki bru na Bholaganj-Ichamati ynnin ka sngi da yachem ki wa u Lat ka jylla u Satya Pal Malik ha Raj Bhavan, Shillong yow e dorkhat deiwa pynsñiaw yei chah pyndik wei chah lehbeiñ ha ki seiñbhalang, ki bor sorkar kam ha ka District Council wa kiwi kiwi pyrchah ya ki bru ri thor wa em ha jylla Meghalaya, khamtam ha ya kitu ki bru kiwa em cha kdong cha chmiang, ki thaw khappood ka Ichamati, Bholaganj wa kiwi kiwi.
Ha kani ka dorkhat wa da ekti ha u Lat da kam wa da em chiboon i pyrchang da ki bor sorkar wow khang ya ki Hindu wow ye ki u khih yow im-ja sngi da ka thong wow pynman ya ki wow mih ki napoh ka jylla wei yeini ki kor ka sorkar deiwa ya krehlang wa ka KSU, FKJGP, HYC wa kiwi kiwi deiwa yoh yarap na ki District Council wa ki pulit da pyntikna ki wa ki dukan wa kiwi ki khih yong ki Hindu toh u man ki kiwa khang hei pyrtuid ka Trading License wa i wym em NOC na ki dong, ki bor chnong waphær waphær.
Da ong wa ini toh iwa pynkhyrngiat wow yoo heiwa ya i bor pynlai kaam ka jylla da chim noh da ki bru yong kini ki seiñbhalang kiwa psiah cha ki thaw khih ki bru yow paan kot wei dep te khang tala ki leh yaki dukan heiwa ka sorkar leh ko kam kawa ym yoo ya kini ki kaam wa man pyrchah yaka aiñ wa leh kini ki seiñ.
Chooh chooh da ong wa kini ki seiñ deiwa ya krehlang wa ki bor District deilang wa ki pulit da pynsangeh ki yaki kari yong ki bru wa man Hindu lane kiwa ym toh ki bru ri-loom wei manda pyntikna ki wa ki toh kini ki jaitbru da pyndik hadooh wa chah dat heipyrtuid ki kot ki sla wa ym em ID, Labour License wa kiwi kiwi.
Da ong leh wa ya ki Hindu kiwa da man ki tre chnong ka Meghalaya da pynbor ya ki wa man-u-snem wow yoh NOC na ki waheh chnong wa kiwi ki bor pynlai chnong. Heiwa kiwa boon na ki toh kiwa khian paaid kiwa ym em leh yaka Card rachon wa Job Card yow kreh 100 sngi kiwa da chah pyndooh yei hok wa toh u yoh ki. Wei manda yaleh ki yaka EPIC, Domicile, Birth Certificate wa kiwi kiwi da hap ki wow maad boon i chah pynchitom hawa yaleh ya kini ki kot ki sla iwa da wanrah hadooh wa ki khynnah da hap ki wow dam u lai skur iwa pynyoo wa da rem ka sorkar heiwa du wow e ya kini ki kot ki sla wa emkaam leh ym ye ko wow leh.
Da pyntip leh wa ki Hindu kini ki thaw khappood da pynbor yaki wow pynkylla yei pyrtuid i mantre ya ki kari kamai cha i pyrtuid yong ki bru ri-loom kani ka thaw kamjooh yei khih i khan leh da leh hei pyrtuid ki bru ri-loom wei yeini da leh kam chibynta ka thong wow pynmih noh ya kamwa 7000 tylli ki manyung napoh ka jylla kiwa sah ha Ichamati wa Bholaganj kiwa boon toh ki Hindu lane ki Sanatan Dharma wei ka niam toh i daw wa da jia ya ki kamni hapoh kani ka jylla wa em 74.59% ki Khristan.
Da pynbaad leh wa ki District Council hapoh Meghalaya yoosar da krehlang ki hajrong kani ka thong deiwa man pyrchah ya ki Niam Khasi, ki Niamtre, Songsarek wa kiwi kiwi deiwa pyndam yaki bor chnong bor synchaar kiwa na kini ki niam deiwa thung da ki Khristan deiwa khang leh yaki suki suki wow leh ki yaka niam yong ki deiwa e nongmuna yeiwa jia ha Kongthong heiwa ka District Council da thung ko da u Khristan kam u Sordar heithaw uwa da jied ki paidbah uwa na ka Niam Khasi.
Chooh chooh da ong wa i kem pathar yaki chynrang heiyatoh wa i jia ha Ichamati iwa da jia haka 28-02-20 da wanrah ko yeiwa eh yaki kynthai wa da chah kem ki kurim, ki khon, ki pa kurim yong ki kiwa da kset khlem da e jamin hadooh wa da chem chitom ki wow pynbiang yei baam wa kiwi kiwa emkaam ki.
Kamtæ da kyntu ya u Lat wow chimkhia ya kani ka kaam yow pynchitom ya kiwa emkti wow wanrah ya waroh ini i chitom da ki bru kiwa leh yaki kaam wa man pyrchah yaka ri, pyrchah aiñ kam wow pynyap bru, u thang yung, i sdang ya ki pynkulmar yow lait noh na ini i pynchitom du neidaw wa phær niam wei phær jaitbru.
Ya kani ka dorkhat da phah leh cha u President ka ri u Ram Nath Kovind, u Prime Minister u Narendra Modi wa cha u Home Minister u Amit Shah.
