Ka Shillong Press Club (SPC) da e FIR ko ha u SP ka East Khasi Hills pyrchah ya ki chipai ka CRPF hajrong iwa jia ynnin heipor kamwa 8:50 i miet heiwa kawi ka kari Maruti Car (rong lieh) kawa em ya u Number ML-05W-3140, kawa da yah da u Ferdison Mylliem Umlong uwa man leh kam uwa yah kari ka Mawphor Group of Publications, heiwa da chah tympra ka kari wei da chah dat u leh ha ki chipai ka CRPF kiwa da chongchit ha i thaw wa tip kam i Mawlai Umthlong (Main Junction).
Uwa yah kari toh uwa dang liwan yung deilang wa ka kurim u wei da em leh ka bei kurim u hadien wa wan li thooh dawai ya ka. Mar ya poi ki ha ini i thaw, da phah pynsangeh ya ka kari heiwa da phah ya uwa yah wow lai u chadien iwa da leh u khlem pyrchah tangwa da chrai pathan ki oo na ki daw wym tip heiwa da dat ki ya ka kari hadooh waka yit kawa nadien da pra ko phrai.
Ka kurim wa ka bei kurim u da ye ki wow paar cha lait yow yut cha yung yow khana ya ini wa jia. Ki bru ka CRPF won ha ini i por da phah ki ya uwa yah kari wow tympleh ya ki bor chbæh ka kari heiwa da kohngooh u; tangwa da leh kulmar ki deiwa tympiah sa ya waroh ki yit kari kiwa dang neh deiwa pynemkaam da ki lati wa ki suloi yow sngoh ya ka kari hadooh wa da nion ko.
Ka SPC da ong ko wa ya ini da sakhi da kiwa boon ki bru kiwa sah ha kani ka dong iwa da pynsih yei pyrtuid wa da sih chwa kini ki bru chipai.
Kamtæ da kyntu ya u SP ka East Khas Hills District wow chimkhai ya ini i kaam wei wow pynchitom ya kiwa emkti yow man ko leh kam ka dak wow yoh biang ki bru yei chaniah ya kitu kiwa da pynkhamti wow yada ya ki bru.
