Ka seiñ Pnar Student Movement (PSM) deilang ka Jaiñtia National Council (JNC) wa kiwa ri syiar, ynne ka sngi da ksoh ki ya ar tylli ki kari Pick-Up wa kit ya ki syiar khlem da biang ya ki kot ki sla nadooh ka Challan wa ka Medical Report neibynta ki syiar wa kit ki ha Petrol Pump wa em ha 7Mer.
Neiliang kiwa yah kari da ong ki wa daw wan ki tre yong kini ki syiar, kamtæ da yang ya ki kamwa soo kynta tam heiwa da wan ki wei da yaklam wei yatai sani bha heiwa neiliang ki ar seiñ deilang kiwa ri syiar da pynbaad ki wa u tre toh uwa pynchah pyrtuid donhi.
Kamtæ neiliang kiwa yahkhmat ki ar seiñ da chim ki da ka rai wow e da ka FIR ha Phramer Traffic Cell hajrong ka yurim wym biang ki kot ki sla, wei hadien wa da dep e ya ka FIR, neiliang yong u OC In-Charge yong ka Phramer Cell da pynsñiaw u wa da yoh u ya ka Challan wa da phah na ka yung krehkaam u Additional SP wa kini ki kari da biang ki ya ki kot ki sla.
Ini da pynphylla ko ya ki seiñ wa kiwa ri syiar wa hadien wa da boon kynta da yang tangwa ym tip ki wa em Challan kini ki syiar wei ini da pynsuba wa da chna thok ya kini ka Challan wa kammon da jan dap 5 kynta ym em phah ya kini ki Challan cha kiwa yah ya kini ki kari kit syiar neibhah katkam ka aiñ ki kari wa lai toh u rah ki chirup wa ka Challan.
Hajrong ini, neiliang ka PSM wa JNC ryngkat kiwa ri syiar da phah ki ya kani ka khubor cha waroh kiwa ri syiar ha ri-loom Jaiñtia wow sñiawbha ki u krehlang neibynta u im kiwa ri syiar yong i yow pynku ya ka khih ka khan ki.
Discussion about this post