Ka seiñ All Jaiñtia Muster Roll & Labour Union lyngba u Adviser yong ka, u Khroo Lamsalanki Pariat deilang wa ki dkhot, ynne ka sngi da mih ki chakhmat yow kyrpaad ya u Montri Rangbah ka sorkar jylla, u Conrad Sangma, ya u Symbood Montri Rangbah, u Sniawbhalang Dhar wa ya u Commisioner Secretary ka chnat Finance, u Dr. Vijay Kumar wow sñiawbha ki u su tulop ya kiwa kreh Muster Roll hapoh 10 tarik uni u bnai, khamtam wa uni u bnai toh u bnai lehkmen Behdieñkhlam hapoh ka Raij Jowai wa Raij Tuber.
Hawa klam cha kiwa thoh khubor, u Khroo Lamsalanki Pariat da ong u hei sakhiat hi da em ka hukum naka chnat Finance wa da pynmih ha ka 7 tarik u bnai June 2022 kawa klam che wa hapoh 10 tarik yong man-u-bnai toh u su tulop cha kiwa kreh Muster Roll.
Khana u wa nadooh wa da pynmih ya katai ka hukum, i su tulop cha kiwa kreh Muster Roll dapoi bait ko hapoh 10 tarik man-u-bnai, tangwa nadooh u bnai October 2024 hadooh katni won da sdang ki u yoh tulop ha ki tarik wa 20 chaneiñ.
Hajrong ini ong u ymtip de yei yi u pynbaad, neibhah palat 2 snem lai bait i su katkam ka hukum wa da pynmih ka sorkar tangwa katni won ym em de lai bait.
Kamtæ kyrpaad joor ki ya ka sorkar wow pynlait yaka tulop hapoh 10 tarik khnang wa kiwa kreh Muster Roll u yoh poisa ki wow pynkmen ya ki khon ki kti ka yung ka sem.
Heijooh i por kyrpaad haroh ki ya ka sorkar wow su dep noh yaka nong Basic Rate wa dang sahteiñ hadooh katni kawa dapoi cha ki 21 tylli ki bnai.
Discussion about this post