E FIR kylla ki BSF wa ki kynthai ka chnong Kuliang, ngat ki chipai ka BSF ha ki kyndon ka POCSO

Heiyatoh wa iwa jia ha chnong Kuliang heiwa ki chipai ka 172 Bn ka BSF wa em ha Border Outpost (BOP) Kuliang da psiah yabor ki ha iwi i yung ka Martina Pohshna hadooh wa da mih leh i kulmar ha ini i yung.

Neiliang ki kynthai wa em ha kani ka yung da e FIR ki pyrchah ya ki BSF wei ki BSF leh da e FIR heiyatoh wa ini wa jia.

Katkam wa pynche da ki BSF, da lai ki cha kani ka chnong hadien wa kdong ya 30-35 ngut ki nong Bangladesh kiwa da psiah cha India yow lai chim yei chini yow chalan tooh cha Bangladesh wa khayi tooh da kiwa chong chnong ka Kuliang heiwa kini ki nong Bangladesh manda yoo ki ya ki BSF da yut ki cha kani ka chnong wei heini i por kiwa chong chnong da e laad ki wow yut kini ki nong Bangladesh wei da khang luti ki ya ki BSF wei da kawang moo ki ki leh.

Ha ini i por da em leh kawi ka kynthai kawa da thlieh da u sdai heiwa da toh uwi u BSF na kti timun u wei da em leh uwi uwa da mynsoo na kti tidiang nei toh da u moo.

Related posts

Kyntait u Paul wa ka kari pulit wa tyrrah ya uwa yah thuk-thuk ha sngi sdang ka Cherry Blossom Festival

November 18, 2024

Kyntu ka manbei wow syndong ya ki jait jakhlia wa pynmih na yung kam ka laad yada ya ka wah Myntdu

November 18, 2024

Kamtæ ki BSF da lai psiah ki cha ini i yung yow lai chim ya u sdai kam ka sabut heiwa heini i por da mih i kulmar manda yaknieh ya uni u sdai heiwa da ya ksoh ya uni u sdai da ki kynthai wa chynrang wa em ha kani ka yung.

Ka FIR won wa da e da ki kynthai da booh ha Khliehriat Women’s Police Station heiwa da Register ka hapoh kiwa boon ki kyndon ka IPC wa kynthup ya ka Section 457/326/354/506/384/34 kiwa yatoh wa i psiah yabor chapoh yung bru heipor miet, i pynmynsoo deiwa pynemkaam da ki tiar ki tar, i thombor ya ki kynthai, i maham bru, i pyntieñ bru wa i wan da boon ngut dei thmu wow pynmynsoo.

Ki BSF da chah pynngat ki leh hapoh ka Section 7 wa 8 ka POCSO Act wa tba khlem akor ki ya ka khynnah kynthai.

Neiliang u SP ka East Jaiñtia Hills da pyntip u wa da Register ya waroh ar ki FIR wei ka takit dang lai ko chakhmat wei ym pu em kem ya kiwon kiwon.

Ha ka FIR wa da booh da ka Martina Pohshna da ong ko wa nyngkong da wan ki BSF heipor kamwa 11:30 i miet kiwa em 3 ngut tangwa ym em sap Uniform BSF ki wei da kynjat yabor ki ya ka dwar yung wei da sdang ki wow tba kti ya u kurim ko u Shanroi Lyngkhoi, wei da taan ki oo ch lait wei da dat da bom ki oo hadooh wa kheiñ i chyieñ krung u.

Heini i por da knieh ki leh ya u sdai na kti yong ka wa da yaleh lang waka khon ko u ksoh oo tangwa ym ye ki wow yaleh pyrchah wa ki BSF wei da pynbaad ki leh wa ki BSF da rah lang ki waka tari.

Hadien ini da wan biang ki BSF heipor kamwa 12:30 i step synyaaw heiwa da em ki kamwa 15 ngut wei da dat biang ki ya u kurim ko wei heipor wa pyrchang ki wow yarap oo da chah pakhot ka khon ko wei da kynjat ki ya ka kam ka manbei hadooh wa da kjut lut i doh i pran ko heipor wa pyrchang ko wow yada ya ka khon ko heiwa da chah kynjat ko na rynkhi wei kini ki BSF da kset ki leh yei ktien ka khon ko hadooh wa da kjut i ktien ko.  

Da pynbaad leh wa da tba kti khlem akor ki ya kani ka khynnah kawa dang 15 snem wei da knieh ki leh ya ka Phone ko.

Da ong leh wa ki BSF da pynyang ki da ka suloi wei da maham ki leh wow siat ki heiwa da kyrpaad ya ki wym toh u siat heiwa da chah maham ki deiwa ong pait iyi wow jia lada wan ki cha Umkiang.

Kamtæ da ong wa da tikna wa kini ki bru toh ki BSF wei lada yoo biang ki dang ye u tipmit ki.