Ka Seiñ Kur Dkhar, East Jaiñtia Hills da ujor ko ha u In-Charge DC ka EJH pyrchah ya u baar jylla uwa da e jait cha ka kur Dkhar.
Ya ka ujor da ekti ynne ka sngi da u Vice President ka seiñ, u Shaniahskhem Dkhar wa u Assistant General Secretary u Pheiñlang Dkhar deiwa synran da u Francis Dkhar, Assistant General Secretary yong ka Seiñ Kur Wapung Circle.
Ka ujor toh pyrchah ya u Seila Dkhar uwa wan kamai ja-kpoh cheini, da chong da sah u ha ka chnong Rangad wei da e jait u cha ka kur Dkhar.
Neiliang ka kur da pynsñiaw ko yei lyngngoh wa kammon uni u dkhar wa poi wiar da yoh u wow e jait cha ka kur Dkhar wei kiyi wa e bor ya oo wei neiwon yoh bor u wow pynemkaam dei jait Dkhar.
Ka seiñ da beiñ joor ko ya ki bru kiwa emkti wow yarap u pynkylla jait ya oo wei kamjooh leh ka kur da beiñ joor ko ya u Waheh Chnong Rangad uwa da e bor ya oo wow yaleh EPIC Card u ha i pyrtuid yong ka chnong.
Ka seiñ kur da kyntu ko ya ki waheh chnong wym toh wow pdiang ya ki baar jylla wow man kam kiwa chong chnong neibhah wa kiwa na baar jylla da wan ki cheini du wow knieh ya ka spah ka phaw wei ym pdiang da kammon kammon leh ya uni u baar jylla wow e jait u cha ka kur Dkhar.
Ka Seiñ Kur Dkhar da kyntu ko ya u In-charge Deputy Commissioner wow leh u yeiwa emkaam.
