Ka Seiñ Niamtre Ki Khynnah Puræ Shillong ha ka kyrwoh wa da phah lyngba u Teinam Dkhar, General Secretary da ong wa da yoo yeiwa pynmih khubor ka Voice of the People Party (VPP) heiyatoh wa i khut sñiawbha ya u Chief Minister ka Assam, u Himanta Biswa Sarma wow wan sakhi u ya ka sngi pynkut ka Behdeiñkhlam ka Raij Jowai ha ka 9 tarik uni u bnai.
Ka seiñ da ong ko wa khlem da artatien wa ka Behdeiñkhlam toh ka lehniam wa kyntang kamjooh kam chibynta ka riti dustur ki Pnar wei i pynman ya ka, i khut sñiawbha ya ki wow wan sakhi chong ko hei mon kiwa pynman ya ka wei hawa leh yeini toh deiwa laitlooid na ki kaam Politics.
“Deiwa burom da kyntu ya ka VPP wym toh u tuklar ko yei kaam pohyung næ wow pyrchang u pynyklla ya ka niam ka rukom, ka dustur riti wow man kam ka rynsan wow yania ya ki kaam Politics. I sñiaw yaphær ha ka Politics ymtoh u tymmoh ko ya ka dustur riti wa da bood nadooh warim yow wanrah yei suk, i yatylli wei ya burom kylliang para bru,” da ong ka seiñ.
I khut ya ki kongsan, ki symbood kongsan wa kiwi de toh ka akor ka burom wei pynyoo leh yei bha mynsien wei ym em mut wa yachah cha kiwon kiwon.
Kamtæ ka seiñ da khut ko ya waroh ki Party, ki seiñ kamjooh ki paidbah wow burom yei man laitlooid wow pynneh pynsah yei man kyrpang ka Behdieñkhlam wei wow ieh u man ko kam ka dak wow wanrah yei chngaaiñ, i ngait, i yatylli khlem da em i pynphiah yow man ko i kyrkhu ya ka juk wa katni wa ki juk wa daw wan.
Discussion about this post