Ka Volunteer for a Better Jaiñtia (VBJ), Jowai kawa da sdang u krehkaam nadooh u Naikhyndæ u snem 2022, da pyntip ko wa da dep ko wow pynman ya ka yalang paidbah ha ka 6 tarik uni u bnai ha heiwa da ap yei angnood yong kiwa boon ki manbei ki manpa wei da dep leh wow lai yachem wa kiwa yalam niam na ki 45 tylli ki chnong ka ri Jaiñtia yow tip yei yoh ya ki Scheme sorkar khamtam kiwa kreh mylla.
Na ini waroh wa da chem, da chim ya ka rai khnang yow wanrah yaka ya jied MLA uni u snem 2023 da kawa khooid, ka synchaar kawa biang wa dap, wow lai kyrpaad ya ki waheh chnong waroh khamtam yow bood ya ka nongmuna kamwa da pynyoo da ka Khimusniang wa ka Panaliar Dorbar Chnong.
Kamtæ ha ka 16 tarik uni u bnai da lai kyrpaad dei thoh ha u Army Lipon, President wa ya u Bishar Shylla, General Secretary ka Synjuk Waheh Chnong Ri Jaiñtia wa ha u Alan Niangti, President wa ha u R. Rq Laloo, General Secretary ka Synjuk Waheh Chnong Jowai.
Ha kani ka yaklam neiliang yong kiwa yalam yong kini ki Synjuk da kyi ki wa neiliang i yong ki leh daw ya pyrkhat bha ki wei wa da yooluti bha wa ki Waheh Chnong ka Jowai wa ka Ri Jaiñtia u pynkrehkaam noh ki ya ki 10 tylli ki kyndon wa da tyrwa ka seiñ deiwa chah u pynman yalang yalap Election MLA du ya u kyrtong wa ki soo ngut ki lok ki yong oo wei u chong yalang du ya kiwa chong chnong heipor wa yalap Election ha ka chnong.
Ki dorbar chnong kiwa ya bi ym toh de u chah ya u kyrtong namo ka seiñ u wanrah bru na kylleiñ ki chnong yow yang dorbar ki khamtam yow lait na i sma i tung, i taroi klong jhep ha ki chnong ki dong.
Yow ye u yaleh pyrchah yaka kjut HIV/AIDS, i kiad, u drugs da kyrpaad ya ki Waheh Chnong wa ymtoh de u chah u uiñ miet/sngi kiwa bood namo u saam poisa, u muaid tanglang ka ya tem sur ya chaad Election jar ki chnong ki dong.
U khang ya waroh ki thaw baamdoh, ki thaw yaleh sñiawbha kiwa em ha u pood u ang ka chnong kamjooh i dai kiad.
Da chim ya ka rai wa u kyrpaad ya ki Waheh Chnong yow hukum ki ya kiwa kreh mylla nadooh ki chynrang ki kynthai yow lai li kreh ki ha ki sngi wa man ka Election wa u wan ki cha ki dorbar wa man ha chnong ha dong.
