theme-sticky-logo-alt
theme-logo-alt

Rai ki soo chnong wow kyrchaan ya u Habahun Dkhar

Ki soo chnong wa kynthup ya ka Musiaw, Umsalang, Latymphu waka Moobandu kiwa em hapoh ka Elaka Shilliang Myntang ha ka yalang wa da pynman ha ka 16 tarik uni u bnai ha Musiaw da chim ki ya ka rai wow kyrchaan ya u Habahun Dkhar, u kyrtong ka NPP ha kani ka Election 2023 na ka 4-Mowkaiaw Constituency.

Ha kani ka yalang da emlang leh u Rudaioo Tang, MDC ka Shilliang Myntang Constituency, u MLA ka Nartiang kamjooh u Montri sorkar, u Sniawbhalang Dhar deilang ki waheh wa ki paidbah kini ki soo chnong.

Da yoh leh i klam na waroh ki Waheh Chnong kini ki 4 chnong heiwa neiliang u Rudaioo Tang da ong u wa i kam u MLA ka thaaiñ, u Nujorki Sungoh wa kini ki 4 chnong kyrchaan tylli ki ya oo da man i iwa bakla neibhah nadooh wa jop u ha u 2018 ym jooh ym de wan yooh kjat u cha kini ki 4 chnong wei ka roi ka paar leh ym em wan ko wei da man ki ki chnong kiwa chah ieh beiñ ha waroh ki 4 snem tam wada lai. Wei da sñiaw sarom wow sñiaw wa u Nujorki won da kam u khlem yurim wei nadooh wa jop u dang ini wan ak wan yooh kjat deiwa wan pynbeij Election u ki ki paaid ka 4 chnong.

“Kwah O wow khana cha phi ki paidbah ka 4 chnong wym em de man ki kiwa yoh hi-eh u chah pynbiej da yoo jngai ki yeini wei da rai ki wow e noh yei kyrchaan tylli tylla ha u kyrtong ka NPP u Habahun Dkhar,” da ong u Ridaioo.

Neiliang won u Sniawbhalang hawa e yei klam da ong u wa i jied ya kiwa mihkhmat toh iwa kyrpang wei lada ym tip wow pynemkaam ya ka Vote daw sepai ki 5 snem kiwa daw wan. Da ong u wa ka sarok ha kani ka chnong toh oo wa e heipor wa man u kam u Montri ka chnat PWD lyngba ka PMGSY deiwa wan dait u Ridaioo.

Da ong u leh wa dang em kiwa dang sahnood ki luti ki syngkieñ kiwa dang sah tangwa lada uwa mihkhmat ka Constituency ym em sur u iyi u leh neibhah ka sorkar toh kawa burom leh ya kiwi ka wym em leh chiliang.

Da ong u leh wa em 3 tylli ki sarok ha kani ka thaaiñ kitæ ka Latymphu-Bhain 2.2 Km, Musiaw-Pdeiniadaw 4.2 Km waka Latymphu-Moobandu kawa 2 Km wei kini ki sarok wa em hakhmat dooh wei mar ya kut ka Election manda wan ka sorkar ya kini u leh nyngkong u wei u phah leh da oo hi wei ym chkeh ha u MLA.

Heiyatoh wa u kyrtong ka Party, u Habhun Dkhar, wa da ong ki bru wa da pynyaleh da u Sniawbhalang, da ong u wa ym ye u man kam uwa pynyaleh neibhah wot ki chi kurim leh lada ym hun ki, ym ye wow pynchong kulmar hi-eh. Kamtæ ym toh u bakla ki paidbah neibhah ha kam kini ki por daw mih boon ki jait klam wei toh u tip ki iwon iwa toh wa iwon iwa thok.

Da ong u leh da wan u cha kani ka thaaiñ kam uwa yarap wei wot cha ki Constituency wa em cha Khasi wa cha kiwi dang yarap kammon u ieh u ya ka Constituency kawa em pyn cha jan wei da yarap u nadooh ya ki Balang, ki kaam yalehbol, ki sarok wa kiwi de hadooh wa da em kiwa ong wa u Sniawbhalang daw yaleh u na ka Mowkaiaw Constituency tangwa kam uwa mihkhmat paidbah kamjooh u Montri sorkar, i kaamram u toh wow yarap.

Heiyatoh wa ka dorkhat wa da e ki soo chnong wow booh ya ka Health Sub-Centre neibhah kini ki soo chnong da em hok ki wow yoh ya ka neibhah da em ki waroh 3106 ngut kiwa chong chnong wei da hap lai ki 15 Km cha kawa jan dooh ka thaw sumaar, neiliang u Sniawbhalang da kular u wow leh yeini haka sorkar thymme neidaw wa slem ki wow wanrah yeini i dawa.

Da yaroh u leh ya u Habahun wa kam u MDC da dep leh u chiboon ki kaam hawa kat chawa lai da yoo sa du ki yung Hall wa ki madanbol.

Da ong u leh wa ka NPP du na Ri-loom Garo da jop bait ko 14 ngut chaneiñ wei na Khasi Jaiñtia ym duna ya 18 ngut wow jop wei da yoh bait u chna sorkar.

Kamtæ da kyntu u ya ki paidbah wym toh u chong ha ka Trailer toh u chong ha ka Seat syndon yow man phi kam ki tre ha ka sorkar thymme wa daw wan.

Share this:
Previous

E ka VBJ da 10 tylli ki kyndon yow pynman yei jied Election wa khooid

Next

Phooh ka yalang bah ka Seiñkur Suchiang