Ka seiñ Jaiñtia Students Movement da e khublei Behdieñkhlam wa suk wa kmen ko ya waroh wa chong wa sah ha waroh talawiar ka Seiñraij Jowai kamjooh chityllup ka Ri Jaiñtia Ri 12 Dolloi.
Ka seiñ da e khublei kitbok kitrwiang ko deiwa ong, “E wa kani ka lehniam Behdieñkhlam u man ko kawa kmen kawa em burom wa phooh wa phieñ ka wow wanrah ha ki khon ka Seiñraij yei kyrkhu iwa sarot na u Trekirot, u yoh u dap da i chait i khiah, i manbha manmiat, i kamai kajih, i khih i kreh, yow nang ku hei kyrdan i stat i tip, i chemphang hei puræ puthi dei wow ku chaphrang, u chongsuk chongsaaiñ u nangroi ka jaitbru waroh kawi”.
Ka seiñ kyrmen ko hawa ksoh wa kune ya ka Dustur Riti ki hukum Blai man i kyrkhu ya waroh ha sla pyrthai. Kamjooh hawa im ka dustur riti skem phooh ka jaitbru ka ri, khnang wa hadooh ki pateiñ u ri u sumaar ki ya a ka dustur riti, chirup i e bor e mynsien u Trekirot u pyndep ya ka niam ka rukom.
Heijooh i por ka seiñ yooluti ko wa ini i lehkmen ya ka Behdieñkhlam u wanrah i khamtam ya i yatylli hapyrdi ka jaitbru khnang wa ka ri wa ka jaitbru u nang roi ko ha ki sngi ki por ki wow wan ha waroh ki liang.
Ka seiñ da ong ko e wa kani ka lehniam Behdieñkhlam u wanrah ko ya i kyrkhu man-u-snem wow yoh i sumaar kyrkhu hei rep i riang, wow man u snem wa soh u kba u khoo, i yuthung yutep u man iwa bha wa soh, kamjooh leh wow lait na ka kjut chitom saja, wow duna i sih i roi, ka choon bichni paradoh parasnaam wow man kiwa yarap kylliang ya chaan kylliang kamwa da booh da thoo da u Blai Trekirot najrong ya i ki bru ha sla pyrthai.
Chooh chooh ka seiñ lyngba u Publicity Secretary Central Body, u Heihok Supuh da ong wa, “U dieñ uwa im ki thied, man uwa im kamjooh uwa skem; tangwa u dieñ u wym em ki thied wym ye de u u im lane skem.”
Kamjooh leh, ka jaitbru kawa ksoh wa sumaar wa ri ya ka dustur riti man ko ka jaitbru kawa im, kawa skem wa kawa ye u yieñ ha ki pateiñ wa daw wan.
Discussion about this post