Ka seiñ EJNC Khliehriat Circle da e khublei ko ya u DC ka East Jaiñtia Hills District, u A. Baranwal wa da chimkhia u wow phah chna noh yeiwa sih ware ki bynta u sarokbah ha ka District.
Kam wow pynkynmoo heini ka seiñ ha kini ki sngi wa dadep dei sñiawkhia, da lai chna ko ya i bynta uni u sarok na Khliehriat kam ka dak wow beiñ ya ka NHAI.
Hadien ini ka seiñ khlem chong kli-kti ha ka 23-05-2022 da lai e dorkhat ko ha ka yung krehkaam u Deputy Commissioner heiyatoh wa da sih ware u sarokbah heiwa da maham leh ka seiñ wa lada ym leh yeiwa emkaam neiliang yong ka NHAI hapoh ar tayaw, ka seiñ daw lai khang ko ya kani ka yung krehkaam kamjooh leh ya ka Toll Plaza.
Ka seiñ da sñiawkmen ko yeiwa chimkhia u Deputy Commissioner heiwa da phah ya ka NHAI wow leh smat yeiwa emkaam heiwa da sakhi leh yeini i jooh.
Heijooh i por ka seiñ daw booddien hi ko leh chakhmat heiyatoh wa uni u sarok wa ymtoh du wow chna pynmiat ha ki bynta wa sih tangwa wot wow chna ya ki dooid harood sarok, kamjooh leh ki thaw wa chong wa lang ka um khnang wow suk ki paidbah waroh.
Puræ leh: Chimkhia ka EJNC wow chna pynmiat ya u sarok Khliehriat
