Ka Jaiñtia National Council (JNC), da e khublei ko ya u MP ka Shillong, u Dr. Ricky AJ Syngkon wa da smat u wow lai pait ya kawi ka yung skur kawa tip kam ka Eklavya Model Residential School (EMRS) kawa em ha ka chnong Jalaphet kawa da chah ieh beiñ da ki boon snem.
Ka seiñ da ong ko wa ini i pynsahteiñ ya kam kini ki thaw wa e yei stat i tip man ko i doohnong kawa khroo ya ki paidbah khamtam ki khynnah puræ kamjooh leh ya kiwa thooh kaam thooh jaam, da pyndooh ko leh yei kyrmen ya kitu ki khynnah kiwa em mynsieñ wow puræ puthi.
Ka seiñ da ong ko leh wa kani ka thaw da man ko kawa sepai kawa toh u pynmyntoi tangwa da kylla ko deiwi.
Kam wow pynkynmoo wa ka seiñ da jooh klam jooh phah ko leh da ka dorkhat da boonsien neibynta wow dawa pynkrehkaam noh ya kani ka thaw e sikai kawa da sah tyngkreng khlem pynemkaam hadooh katni, tangwa neiliang ka sorkar hadooh ynne leh ym pu yoo yei kaam yong ka, da ong u GS ka JNC, u Wanshwa Suting.
Nei wan pait u MP ha ka 3 tarik uni u bnai, da kyrmen skem wei yooluti wa daw leh u yeiwa emkaam tam khnang wa kini i thaw e sikai wa em ha ka thaaiñ ym man ki kiwa sepai.
Neiliang ka seiñ da kyrpaad joor ko ya u MP wow sñiawbha u yarap klam, u ong, u pynsñiaw cha ka chnat Tribal Affairs kawa toh u pait yeini khnang wow wanrah ko yei myntoi khamtam ya ki khynnah puræ. Ka seiñ da kyrpad ko leh ya u MP wow boodien u ya kam kini ki jait kreh wa sahteiñ wei wow thooh tre u leh wa i dawbah dawsan wa pynman ya ki u chah ieh ki kamni boi em kayi ræ kayi cha kylla, neibhah wow pynhun du ya ki Contractor ym ye wow pdiang, pynkut u Wanshwa Suting.
Discussion about this post