Ka seiñ Jaiñtia Student’s Union (JSU) Nartiang Circle da pynsñiaw ko yei mynsien wa kmen hadien wa da yoh Doctor biang ki ha ka PHC Nartiang ka wym em Doctor la kamwa 4 bnai kattu.
Neiliang ka seiñ da e khublei ko nyngkong ya ka yung krehkaam u District Medical And Health Officer (DMHO) waroh kawi ka wa bien ki u ya krehlang heiyatoh wow yoh Doctor ha kani ka PHC.
Ka seiñ JSU hapoh i yahkhmat u President, u N. Mukhim, u Secretary A. Sumer kamjooh u Organising Secretary, u S. Phalyngki da lai yachem kyrpang ki ya u Dr. Pohsnem uwa da jooh kreh boon tylli ki snem hapoh kani ka PHC wei katni da poi biang u ha kani ka jooh ka thaw.
Hajrong ini neiliang ka seiñ da kyntu ko ya uni u Doctor wa kiwi kiwa kreh ka PHC wow nang kreh bha chooh chooh wow chakri ya ki paidbah.
