August 11, 2022
U Lamphang ka yung dorbar chna aiñ ka jylla, u Metbah Lyngdoh da ong u wa i takit harong i oor i tnoom kyllung (Dome) yong ka yung dorbar wa dang thymme da lai i chaphrang wei da pyntip u wa da dkyntu ya u Montri Rangbah ka jylla wow pynsmat wow e kti ya ka bui (Report) da ka chnat PWD (Buildings).
Da ong u wa da yoh yutip wa ka IIM-Guwahati ha kawa da e kti wow takit da jan dep pynkhreh ko ya ka bui heiyatoh wa i chngaaiñ yong ki ar bynta kani ka yung cha timun namo ka Right Wing wa tidiang namo Left Wing, wei katni dang pait bniah yei skem yong i yurim (Foundation) yong kani ka yung.
U Metbah da pyntip u leh wa u Montri Rangbah da chimkhia u ya ini i kaam wei da kular u wow phah pyndep noh ya i takit katwa smat, wei hadien daw khut yaklam won ha ka High Powered Committee.
Kam wow pynkynmoo heini, i tnoom kyllung yong kani ka yung wa thymme ha Mawdiangdiang da haap i syndet syndet chiteiñ synyaw ka 22 Naisan uni u snem, heiwa da chah ktah leh boon ki bynta yong kani ka yung. Hadien ini neiliang ka High Powered Committee wa pait ya i chna ya i yung da thung ko da ka takit wa laitlooid namo ka Third Party Audit, ya iwa da e kti cha ka IIM na Guwahati.
