Ka KSU da pynsñiaw ko yei sñiawkmen wa hadien 21 snem i angnood yong ka seiñ wa ka jaitbru da mankaam hadien wa ka sorkar ha uni u snem 2022 da pdiang ko yei dawa wow tipmit noh ya ka Lady Hydari Park kam ka Phan Nonglait Park.
Ka KSU ha u snem 2001 hapoh i yahkhmat u Danny M Khyriem da lai pynkylla ki yei pyrtuid katai ka Park cha ka Soso Tham Park hadien i ood i naam yong ka seiñ wa da boon boon sien ym em psiah i cha chkoor ka sorkar. Hadien ini ha u Naikhynde 2001 da pyntip wow pynkylla pyrtuid noh ya ka Park cha ka Phan Nonglait Park.
Hadien wym em leh ka sorkar iyi iyi leh, ka KSU ha ka 30 tarik u Kmaichonglad 2017 kawa man leh ka lyngkhooh sngi yap u Kiang Nangbah wei kamjooh ha u snem wa bood ha ka 4 tarik u Naitung (Apr) 2018 ka seiñ da pynman yakhih ko hakhmat kani ka Park yow dawa na ka sorkar wa toh u pynkylla smat yei pyrtuid kani ka Park cha ka Phan Nonglait Park kamwa da kular ha u 2001.
Ka seiñ da looid ko leh ya ka Signboard wa thoh da i pyrtuid Lady Hydari Park wei heithaw yong ini da booh da ka Signboard wa thoh Ka Phan Nonglait Park & Animal Land. Hadien ini, ka seiñ da phah ko dei thoh man-i-por cha ka sorkar wow pynkynmoo ya ini i rai wa da chim ha u 2001.
Ini i lai tynrooh ka seiñ da mankaam i hadien wa u Montri ka chnat Forest & Environment , u James PK Sangma ha kini ki sngi wa dep da pdiang u yei dawa wow pynkylla noh yei pyrtuid yong katai ka Park cha ka Phan Nonglait Park. Kamtæ ka seiñ da e khublei ko ya u Montri kamjooh ya ka chnat wa da bien ki wow leh yeini.
Puræ leh: Pynkylla ka KSU yei pyrtuid Lady Hydari Park cha ka Phan Nonglait Park And Animal Land
