Ka All Jaiñtia Farmers Welfare Union, Jowai kawa da seiñ kattu da tam le bnai ha Jowai, neitae da lai chah sikai ki warep ha ka College of PG and Agricultural Science, ha Umroi Ri-Bhoi District, neitæ dang ha u bnai uwa da dep u Dean chirup wa ki Scientist ka College da wan saam ki ya u symbe cha ki 25 ngut ki warep ha Pynthor Neiñ, Jowai.
Ha kam kani ka por wa ki warep da sdang ki u pooh u daiñ ya ki hali yow sdang u pynhap ya u symbe u phniang ha ka Bei Rymaw, neiliang yong ka seiñ e ko ya i sñiawngooh ya u Garod LSN Dykes (IAS) Deputy Commissioner ka West Jaiñtia Hills District ya iwa da ap u yei ood yei naam, heiwa da ebor u yow em uwa dai wakhu, ki wait næ ki tiar rep hapoh ka District, heijooh i por da e yei sñiawngooh ya u ES Shylla Waheh Chnong ka Dorbar Chnong Tympang Iawmusiang Jowai uwa da chah ya u Wellon Shadap wow dai ya ki tiar rep ha Iawmusiang, Jowai ha ka sngi Walang wa ka sngi Choh-that, yow yoh ki warep u thied ya ki tiar rep kiwa dawa ha kam kani ka por wa hap khang ka sorkar ya ka yaw ka haat.
Da kyrpaad ya u Waheh Chnong ka Iawmusiang yow elaad u ya ki warep u wan thied tiar na thaw dai u Wellon hajan ka yung ka Seiñ Raij Jowai Market Complex. Da kyrpaad ya waroh ki warep yow wan thied tiar ki heitai ha thaw dai u Wellon Shadap.
Heiyatoh wei sboh kawa jooh e na ka Office u District Agriculture Officer, da kyrpaad ya u montri rangbah ka jylla wa ya u montri wa pait ya ka chnat i rep i riang wa u sñiawbha ki u pynyoh ya i sboh cha ki warep, watoh wa da jan poi ki sngi ki por u pynemkaam ya i sboh ha hali ha pynthor. Heijooh i por da kyrpaad yaka sorkar wa u sñiawbha u yaleh u pynyinsur manda toh i por wow saam ya i sboh, yow yoh lang ki warep ya i sboh manda wan thooh ki na ka Office.
Ha kini ki sngi kiwa da dep yoo yaka Wyrta wa ka sorkar jylla hapoh i yahkhmat u Conrad K Sangma, da tipmit ki ya u snem 2020 kam u snem yong ki warep, neiliang ka seiñ da pdiang sñiawbha ko ya ini i pynbna, yooluti bha wa ka sorkar jylla ym pynkut ko du ha i pynbna donhi, kamtæ da kyrpaad wow ya emlang ko chirup chirup wa ki warep ha ki sngi yong kani ka samoi rep. Khamtam yow yoh yarap ki warep ha ka jylla wa khamtam ha ri-loom Jaiñtia liang wa nang. Kamwa da yoo ha kini ki sngi wa hap u chong khop jar i yung i sem, ha kawa kiwa chong chnong da sdang biang ki u rep jhoor rep kba ha ki kpær, ha hali ki yong ki hi.
Ini i man i long e bor e mynsien bha ko ya ka seiñ, manda sdang u mih ki jhoor u kba u khoo na kini ki loom ki pdeiñ ki yong ki. I dawa na kiwa chong chnong ya kini ki jhoor nang joor, ini pynyoo ko wa da sdang biang u sñiawthooh ya i bha wa i yoh myntoi hawa baam da ki marbam mardih kiwa mih na kini ki loom kiwa da kyrkhu khyrdoh bha ka Bei Rymaw ya i waroh kiwa im ha kini ki loom.
Ka seiñ kyrpaad ko ya waroh ki warep jhoor, kiwa ri mrad, ki tre hali ha kylleiñ ka ri-loom Jaiñtia wa u sñiawbha u ya mih chakhmat yow ya tylli lang kam ki warep, yow ya krehlang chirup wa ki bor ka sorkar jylla wa ka sorkar India ha i yahkhmat u Narendra Modi hapoh ka ri wa u Conrad K Sangma haka jylla, yow yoh yarap chooh chooh ki warep na kiwa boon ki song yarap na ka sorkar India, manda dep kaam chooh ki neini. Kitu kiwa ym pu em Aadhaar yow yaleh u pynpsiah pyrtuid, khnang wa iyi iyi i thmu ka sorkar ya ki warep u man kaam sakhiat deiwa ya krehlang chirup chirup neibynta im ka ri wa ka pateiñ kawa daw heh.
Ka kyrwoh na u Jurbha Phawa (Khliehtyrchi) President, waka Marche Sari (Mukhla) General Secretary.
Puræ leh: Ha ka Farmers Parliament pynbna u Conrad ya u 2020 kam u snem ki warep
Discussion about this post