June 29, 2018

E khublei ka YTBCM ya ka Elsarica Umdor wa chah jied ko wow lai cha ka India Sub Junior National Coaching Camp

Advertisement ad1

Jowai: Ka Young Talent Badminton Club Mawlai (YTBCM) da e khublei ko ya ka Elsarica Umdor wa da yoh ko wow lai mihkhmat ya ka jylla ha ka India Sub Junior National Coaching Camp ka wa dep man ha Prakash Padukone-Dravid Training Centre, Bangalore.

Neiliang u Secretary ka Club u S. Warjri da pynsñiaw u yei sñiawngooh ya ki bei ki pa, ya ka Meghalaya State Badminton Association khamtam ya ka St. Mary’s Higher Secondary School kiwa da chah ya ka Elsarica ha kam kini ki por Exam wow lai chimbynta ha kani ka National Coaching Camp wei ka Club da e ko ya i kyrkhu wow leh bha ka Elsarica yow pynbniah chooh chooh yei sap yong ka yow chah jied ko wow lai mihkhmat ya ka ri yow man ko ka burom kawa khroo ya ka chnong Mawlai wa ya ka jylla waroh kawi.

U Secretary ka Club da ong u wa kiwa mihkhmat toh wow e yarap ki ya ka Club khnang wa ka Club u ye ko u pynmih chiboon ki khynnah wa em sap yalehke Badminton wow yoh laad ki leh wow pynkhreh ya ki neibhah katni ka Club dang pynkhreh ko neibynta ka State Champion Tournament 2018 ka wym slem de da sdang.

Ka Club da e khublei kyrpang ko ya u G.E. Lyngdoh u District Sports Officer uwa da yarap wow e ya ka Badminton Court Mat ya ka Club wei da yarap bha ko ya kiwa yalehke nadooh wa yoh ya kani ka Court Mat.