U General Secretary ka United Democratic Party (UDP), u Titosstarwell Chyne uwa man leh u MDC ha ka KHADC, hawa wan wow yalap Election neibynta u kyrtong ka Party cha ka Election MP chiteiñ samoi ha ka yalang wa da pynman ha Tpep Pale, Jowai ha ka 19 tarik uni u bnai, da e khublei u ya ki paidbah kiwa da kular wow neh bait wa ka Party kiwa skem wei ki wym kylla.
Yeini da ong u hadien wa mih ki khubor wa em ki MLA ka Party wa ye ki wow lai psiah cha ka National Party ka wym pu ye u pyntikna hadooh katni iyi wow jia.
Da ong u wa lada kylla kiwa yahkhmat neipor cheipor tangwa ki yurim ka UDP u neh ki i jooh hi wei man ko leh ka Party ri-loom wa heh dooh ha Meghalaya kawa da yieñ yow yada yei yei hok, yei mantre yei khyndaw u chyiap, ka dustur riti wa i man kyrpang kam ka jaitbru wa khian paaid.
“Iyi wow jia ya ka mynried ka jaitbru lada ym em de ki seiñ ri-loom, sñiaw dur phi wa ki National Party daw ye ki wow yada ya ka dustur riti yong i, yei khyndaw u chyiap yong i ?” da kylli u Titos.
Khamtam da ong u wa ha India kawa boon ki jaitbru wow tyllunglang wa ki ymtip de iyi u jia.
Da kdaw u wa Politics ym jooh kylla ko tangwa kylla kiwa mihkhmat kiwa da mylliñ yeiwa da kular ki hawa lai ki cha ki paidbah, kamtæ da kyntu u ya ki dkhot ka Party wa lada jia kammon kammon leh wa emkaam yei sur ki ri-loom u thai ki hapoh ka Parliament neibhah lada jied da ki National Party da hap ki wow rwai yei jooh bait i sur.
Discussion about this post