Ka Jaiñtia Institute of Technology (JIT), Jowai ynne ka sngi da e khusnaam namo ka Award ya ki 3 ngut ki khynnah puræ yong ka kiwa da poi chakhmat haka Exam yong ka Diploma Course ha ka Computer Application.
Napyrdi ki 15 ngut kiwa yakhun, ki 3 ngut wa dapoi chakhmat kynthup ki ya ka Delizia Jones Tariang hei kyrdan wa nyngkong, wa ar ka Wanpynhun Lathong wa le won ka Arwanki Suchen.
Kam i dak pynchlur ya kini ki khynnah wa da leh bha, u Managing Director ka JIT u Bankitbor Marweiñ da e kti u haka Delizia Jones Tariang da ka Computer (Full System), ya ka Wanpynhun Lathong da u Pendrive wa 64 GB ya ka Arwanki Suchen won da u Pendrive wa 32 GB.
Heijooh i por neiliang u Managing Director da pynsñiaw u yei sarong ya kini ki khynnah, deiwa ong wa ini man ko leh ka nongmuna ya kiwi won wow lehbha ki chakhmat.
Booh haroh u i kyntu ya ki khynnah wym wow wan ha kani ka thaw du kat u yoh Certificate donhi, tangwa iwa nyngkong hi u yoh yei stad i chemphang.
Neitæ da pyntip u leh wa kam ka Institute ha ki por wa chakhmat daw thooh laad haroh ko wa kammon u pynyoh khih ya ki khynnah wa da dep puræ na kani ka Institute ha ki Company waphær wa em hapoh ka jylla.
