Uwa yaleh bol wa pawnaam ka Meghalaya uwa man leh u khon u (L) Syntar Klas Sunn, u Eugeneson Lyngdoh da pynbna u ynne ka sngi wow yakhun ya ka Election chiteiñ samoi na Mawphlang Constituency kam u kyrtong ka UDP iwa da pynbna u ynne ka sngi.
U pa u Eugeneson, u Syntar Klas Sunn, toh u MLA samen ka Mawphlang Constituency chwa u khlaad u ha ka 10 tarik uni u bnai heiwa da man u kam u Associate Member ka UDP.
Ha ka 28 tarik uni u bnai, u Eugeneson da wan tyrwa cha oo wow yakhun Election na kani ka Constituency hei thaw u pa u.
U Eugeneson toh u waheh na ki arngut ki khon chynrang u Sunn. Da em u leh arngut ki payu kynthai wa uwi u diah khian.
Ka Election Commission of India ha ka 28 tarik uni u bnai da pynbna ko yow pynman ya ki Election chiteiñ samoi ha ki le tylli ki Constituency kitæ ha ka Mawryngkneng, Mawphlang wa Rajabala, kiwa da thylli hadien wa khlaad u David A Nongrum uwa mihkhmat ya ka Mawryngkneng Constituency, u SK Sunn na ka Mawphlang Constituency wa u Dr. Azad Zaman na ka Rajabala Constituency.
Ka sngi thap Vote toh ha ka 30-10-21 katwa ka sngi niaw Vote won toh ha ka 02-11-21.
