Ka Khasi Student Union (KSU) Jowai Circle, ynne ka sngi da e kti noh ko ya i yung wa da chna neibynta kawi ka manyung wa da dooh ya ar ngut ki khon deilang wa i yung hadien wa baam i diñ ha ka 21-11-2021 iwa da jia ha Ummulong heiwa ka seiñ da rai ko wow chna noh ya ini i yung heiwa i kreh da sdang i nadooh ka 5 Duyatra (Jan) 2022 wei da ekti noh ya ini i yung ynne.
Ha kani ka sngi, chwa wow ekti ya i yung cha ka Mansoki Challam wa u kurim ko, u Junom Suna da em ka yalang wa tbian wa pynlai da u Shiningstar Kharbihkhiew In-charge ka KSU West Jaiñtia Hill District.
Ha ka yalang da yoh i klam na u Assistant Waheh Chnong ka Ummulong u Sambor Lamare, u Iaitphar Syngkrem uwa man u President KSU West Jaiñtia Hills District wa kiwi kiwi de.
U President wa heh dooh ka KSU, u Lambokstar Marngar da ong u wa kani ka manyung da dooh ko ym du i yung, kamjooh leh ya ki arngut ki khon wei hap wow pdiang yeini kam iwa da booh da uwa booh wa thaw deiwa kyrkhu leh ya ka manyung wow yoh ki yei chait i khiah wa ka kamai kajih kawa biang wei da e khublei u leh ya waroh kiwa da emkti wow pynmankaam ya ini waroh.
Ha kani ka sngi da emlang u Manly Nongpluh, Finance Secretary ka KSU CEC, u Phraki Thubru, Secretary ka seiñ wa ki dkhot ka Executive Committee.
Puræ leh: Dooh ki ar ngut ki khynnah yei mynsien hadien wa baam i diñ ya i yung ha Ummulong
