U Montri ka chnat Sports and Youth Affairs ka sorkar jylla, u Shakliar Warjri ha ka 23 tarik hawa wan sakhi yaka yalehke Meghalaya Games ha Jowai da e kti u da ki tiar yasiat cha ka Shooting Association yong ka West Jaiñtia Hills District, kam chibynta i kyrchaan i yarap neiliang ka sorkar yow pynkhlan chooh chooh ya kani ka sap yalehke hapoh ka District.
Ya kini ki tiar da e kti u haka yalang tbian wa da pynman ha yungwalieh ka Chilliangraij, Jowai ka thaw wa pynman leh yaka yalehke Shooting neibynta ka 6th Meghalaya Games 2025.
Ki tiar wa da e kti u kynthup ki suloi, ki Shooting Target Machine (10 meter), hei ya emlang u Working President ka MSOA, u John F Kharshiing, u Working President ka WJDSA, u EMH Passah, ka ADC, HML Kynta, u Additional SP, u Ishan Gupta wa kiwi kiwi.
U Shakliar Warjri hawa klam, da khana u wa neiliang ka sorkar da chim rai ko wow pynku yei sap yalehke Sports kamjooh wow pynkupbor ya ki khynroo deiwa pynbiang ki thaw yalehke ya kiwa em sap haka jylla.
Ong u leh wa ka sorkar da chimkhia sakhiat ko u pynku yaki jait yalehke Sports waphær waphær ha waroh 12 tylli ki District ka jylla yow ku i roi i paar kamjooh u yoh leh ya ki laad ki kabu ha kiwa boon ki bynta.
Wei lyngba i pynman yaka 6th Meghalaya Games, ong u ka sorkar da chim rai haroh ko wow pynman ya kani ka lympung ha waroh 12 tylli ki District khang yow pyntikna wa i roi i paar u poi ki wot cha ki kdong ki chmiang ka jylla.
Discussion about this post