Ka Joint Action Committee (JAC) kawa kynthup ya le tylli ki seiñ, kitæ ka East Jaiñtia Hills Truck Owners and Transporters Association (EJHTOTA), ka East Jaiñtia Hills Limestone Suppliers Association (EJHLSA) waka East Jaintia Hills Drivers Association (EJHDA), lyngba ka kyrwoh wa da phah da u Deolangki Dkhar, Secretary wa u Soomeyoo Sayoo, Spokesperson yong ka, da e ya i kyrchaan wa pura hajrong i khut pakhang ya u sarok NH-6 ha ki thaaiñ Narpuh, kawa da khut pynman da ka Joint Action Committee (JAC) yong ki 11 tylli ki chnong yong ka thaiñ Elaka Narpuh, ka wow sdang mynstep nadooh i por 7:00 waje i step ter ter khlem da booh por pynkut de, khnang wow pynbor ya ki bor sorkar kiwa kynthup nadooh ka sorkar pyrdi hadooh ka sorkar jylla wow pynchna noh ki deiwa toh rukom bha ya u sarok NH-6, neibhah katkam wa man kattæ, uni u sarok da jæd da pra bha u hadooh kattæ kattæ kat hadooh wym hoi de u lai u wan ki kari ki mator.
U sarokbah NH-6 toh u sarok wa emkaam bha hadooh kattæ kattæ yong ka jylla Meghalaya, kyrpang ya kiwa chong chnong yong ka thaaiñ Narpuh wa ka East Jaiñtia Hills District, kamjooh leh wa ki kattu katni tylli kiwi tawon ki jylla yong ka thaaiñ chakhlieh-mihsngi yong ka ri India. Tangwa sñiawsih u yoo wa uni u sarok da chah iehbeiñ u neipor cheipor ha ki bor wa toh sap u pait yong ka sorkar pdeiñ wa yong ka sorkar jylla, kat hadooh wa katkam wa man kattæ da jæd da pra u la phrai, u wym man de u lai luti ki kari lyngba yong uni u sarok.
Ini i man i long yong uni u sarok NH-6 kamni da booh ko ya ki paidbah wa lai wa wan hei eh i khoo wa kordit bha wei ha i maa, khamtam ya ki wapli kiwa kjut wa chitom, kiwa emkaam u poi smat cha ki thaw sumaar, thaw e dawai. Kani ka rukom man wa yoo wyrai yong uni u sarok, da ktah joor ko haroh ya ka pliang ja yong kiwa boon kiwa jooh kamai ja-kpoh deiwa em uni u sarok.
Katkam wa man kattæ u lai luti lyngba yong uni u sarok NH-6 toh u lai li sahkut, lai thooh kjut hi-eh da ki phaw phaw kynta wei ym yoh hi de u poi chei thaw wa da mang.
Kat da kamtæ, neibynta i bha i miat yong u paidbah uwa emkaam ya uni u sarok, ka JAC e ko ya i kyrchaan iwa pura ya ka JAC yong ki chnong ka thaaiñ Elaka Narpuh heiyatoh wa kani ka pakhang surok yong ki, ka wow sdang nadooh mynstep i por step khnang wow pynbor ya ki bor sorkar wow chim khia ki heiyatoh wa i bha i miat i wow neh wow sah yong uni u sarok.
Ka JAC pynsñiaw haroh ko ya i sñiawngooh wa khroo hadooh kattæ kattæ ya ka JAC yong ki chnong yong ka thaaiñ Elaka Narpuh hajrong i chah chitom yong ki pli hadooh wow khut ya kani ka pakhang surok ha pyrdi u slap ka la-ær, kawa khlem booh por neibynta i bha i miat yong ka lai ka wan yong u paidbah lyngba yong uni u sarok NH-6.
Khaddooh dooh, ka JAC sa chisien dawa joor ko na ki bor sorkar, nadooh ka sorkar pyrdi hadooh ka sorkar jylla ki wym leh ya jar jiar i kaamram heiyatoh wa i bha i miat yong uni u sarok. Ymtoh u pynchitom ki ya u paidbah kamni man-i-por neidaw yong uni u sarok. Ka JAC da maham ko leh wa u pait ko hapoh kini ki kajiak sngi iyi wow leh ka sorkar hajrong uni u surok. Lada jia wa ka sorkar ym bna ko iyi iyi leh wot hadooh katni chitom u paidbah, ka JAC u chim ko da kawi tawon ka rai kawa khor bha khnang wow pynbor ya ka sorkar wow chna pynbha ya uni u sarok.
Discussion about this post