Ka MeECL lyngba ka chnat ko ka MePDCL kawa saam bordiñ da pynbna ko wa da pynkrehkaam biang sa chisien ya ka OTS (One Time Settlement) Scheme yow yarap ya ki manyung kiwa dooh wa duk wow su ya ka bai bordiñ ki kawa dang sah khlem su.
U Montri Rangbah ka jylla, u Conrad Sangma hawa chimbynta ha ka yalang wow pynyoo ya kiwa da yoh myntoi na kani ka Scheme, da pyntip u wa kani da chna kyrpang ka neibynta kiwa khian wa nai, kiwa dooh wa duk heiwa da maap 100% ya ka kuna kam ka Late Fees wei u kheiñ du ka bai bordiñ donhi.
Ya ka bai bordiñ ye u su chwa 40% wei kawa sah ye u su kajiak chisien iwa 6 sien khlem da kheiñ kawon kawon ka sut.
Kani ka OTS Scheme man ko leh neibynta kitu kiwa da chah ah bordiñ kiwa pynemkaam ya ka Load wa 5KW chapoh (DLT) wei kiwa man leh kam ki BPL.
Ya kani ka Scheme ye u leh hadooh wa kut uni u bnai March, 2025.
U Conrad da pyntip u wa ka kuna wa da maap dapoi ko Rs. 26 klur neibynta ki 45,000 tylli ki manyung, waroh ka poisa wa dang sah khlem su da man ko Rs. 119 klur tangwa daw yarap won ko ya kitu kiwa pynemkaam bordiñ wow sdang thymme ki khlem da em ka yukit warim kawa khia.
Kiwa kwah wow leh ya kani ka Scheme ye ki wow lai cha ki yung krehkaam ka MePDCL deiwa yachem wa ki Assistant Executive Engineer (AEE).
Ye leh wow Phone ha u Helpline No. 1971/1912.
Discussion about this post