Ka jylla Manipur kawa da em hapoh ka President’s Rule kattæ heiwa yei kaam i jaam ka sorkar da pait da u Lat ka jylla, u Ajay Kumar Bhalla, ynne da pynmih u yei kyntu ya kiwa chong chnong ka jylla deiwa ong wa da hap maad yei boon i sñiawsih iwa da ktah yei chongsuk deiwa neh i kynaad da palat 20 bnai kattu.
Kam chibynta wow wanrah biang yei long i man kamwa jooh man nachwa, neiliang u Lat da kyntu u ya ki paidbah wow pynkut noh yei mynsoo mynsnaam deiwa kyrpaad ya kiwa chong chnong khamtam ki khynroo wow wan ki chakhmat wow pynuiñ ya ki tiar yasiat, ki kuli kiwa da tooh ki kamjooh kiwi ki tiar wa da yoh ki pyrchah ya ka aiñ deiwa lai booh ki ha ki Police Station, ki Out Post wa ki thaw wa em ki chipai ha kini ki 7 sngi deiwa kheiñ nadooh ynne.
U Lat da ong u wa ini man ko kam i sdang wow wanrah biang yei suk i saaiñ wei kam ka luti wow poi chei suk deiwa kular leh wym pynchitom ya kitu kiwa pynyuiñ ya kini ki tiar yasiat ha kini ki por wa da booh wei hadien won daw pynchitom ya kitu kiwa dang em ya kini ki tiar yasiat.
Da ong u leh wa ka sorkar kwah ko wow wanrah yei suk wei wow yada ya ka mynried ki khynroo wei wow pynbha pynmiat deiwi ya ka jylla yow yoh ya ka mynried wa tyrchaaiñ. Kamtæ da ong u wow wan chakhmat deiwa jied yei suk i saaiñ.
Discussion about this post