Ka Employment Monitoring Cell ka KSU ynnin ka sngi da yoh ko wow yachem wa ka Idashisha Nongrang kawa man kam ka Director General of Police (DGP) Meghalaya hajrong ka Office Memorandum wa da pynmih da ka Home (Police) Department wa daw chah wow thoh Written Exam du ya ki kattu katni ngut deiwa kheiñ da 1:20 (iwa mut 20 ngut neibynta kawi ka kaam wa lait) na kiwa da chah jied hadien wa pyndep ya ka Physical Efficiency Test (PET).
Neiliang ka seiñ da kyrpaad ko wa toh u e laad ya waroh wow thoh ya ka Written Exam kiwa da chah jied hadien wa pyndep ya ka PET kamwa da man ha ki snem wa dadep wei ymtoh wow jied da ka 1:20.
Ka seiñ da ong wym toh u jied du ya kiwa wan chakhmat ha ka PET neibhah waroh toh u yohlaad ki wow thoh Exam neibhah em boon kiwa stat wei kammon khlem da yoh laad ki wow pynyoo yeini.
Ka seiñ da ong ko leh wa ha ka jylla da em boon bha ki khynroo wa thooh kreh sorkar wei lada kamni wa thoh ha ka Office Memorandum ym yahaap neibhah dadep ki wow kreh chitom wei da chah jied ki leh hadien wa da pyndep ki ya ka PET wei lada leh kamni daw pyndooh mynsien ko ya kiwa boon.
Neiliang ka DGP da pynche ko wa neiliang yong ka leh ym em sñiaw yahaap ko yeini wei da em i yaklam wow pynkylla ya kani ka OM, tangwa ka rai wa khaddooh hi chong ha ka sorkar.
Da pyntip ko leh wa dang yang yei yukheiñ yow tip hadooh katwon ngut em waroh kiwa da chah jied na kiwa yaleh PET wei lada em kiwa daw dooh wow thoh Exam. Kamtæ da ong ko wa daw pyrchang wow e laad ya waroh kiwa da chah jied wow yohlaad ki wow thoh ya ka Exam.
Discussion about this post