U Heiboklang Suting kam u kyrtong samen wa yakhun ya ka Election MDC na ka 4-Amwi Khliehtyrshi Constituency ha ka yalang yalap Election yong oo ha chnong Sohmynting hei miet ka 18 tarik uni u bnai, da ong u wa kam u bru wa em i thrang i angnood wow chakri u mihkhmat ya ki paidbah cha ka JHADC, yieñ u ya kani ka Election dei tipbru tipblai wei lada poi u haka thong i jop u chakri hok u ya ki paidbah.
Hawa kyrpaad ya kiwa chong chnong ka Sohmynting wow jied ki ya oo kam u tre chnong ong u, “Chim ya nga kam u doh u snam yong phi, chim ya nga kam u bru yong phi, pynemkaam ya nga, lada e laad phi san snem u kreh O daw yoo phi ya ki kaam wow kreh O, wei lada nga ym ye O u kreh neibynta yong phi pna nga hi wow dam yaleh Election hadien 5 snem”.
Paan maap u leh na ki paidbah lada em i lait i let yong oo haki snem wa dalai, wei lada pynjop ki ya oo, nyngkong u yarap chwa u yaka chong ka thaw yong oo hi, heiwa da e nongmuna u pyn ya ki manbei manpa wa wot ki leh jan i jooh hi hawa yoh ki iwon iwon i yarap ym tharai wow yarap chwa ki cha kiwi yung deiwa ieh yei yong idæ.
Neitæ lada chah jied u kam uwa mihkhmat kular u leh wow emlang lynter wa ki khon ka chnong, wym toh kam kiwi wa nabaar wa wan chisien san snem hi-eh wow wan kular wan lehbha dep te mylliñ.
Wei i yakhun u ya kani ka Election ymtoh du kat u jop donhi tang wow hikai leh yaki paidbah haka luti wa bha.
Chooh chooh kyrpaad u ya ka chnong ka thaw wa ka Constituency 4-Amwi Khliehtyrshi waroh kawi wow pynchong nia u pyrkhat ki dei miat kat dang biang i por wei haka 21 tarik u jied ki ya oo kam uwa mihkhmat.
Pynrap haroh u deiwa ong, “Lada kiwi ong ki ym jop O leh nga ong O daw jop O neibhah em uwa yaleh neibynta yong nga wow jop O dei bor yong oo”.
Heiyatoh waka District Council won khana u wa em u i angnood wow wanrah i krehkaam wa thymme deiwa bait wa ryntih hapoh District Council, u thooh laad kammon u pynmih yarong poisa yow yoh poisa ka Council u su tulop ya kiwa kreh.
Discussion about this post