Jowai: Ka Jaiñtia Students’ Union (JSU) Central Body da pynsñiaw ko wa ym ye wow pdiang ya i leh embor da ka Company GVK ya ki wakreh yong ka 108 kawa da chim noh ya i hok kamai yong ki wot hapyrdi i eh kawa kini ki wakreh dang maad ki.
Ka seiñ ka dawa ko leh na u montri ka chnat i chait i khiah u Alexander L Hek wa da toh wow ap u ya ini i eh yong ki wakreh 108 wei ym toh u chong ap u du ya ki daw wa e daka GVK wei lada toh u pyndam noh ya kani ka Company na kani ka jylla, ka sorkar hap ko wow leh chisyndon khlem da booh por neibhah kani ka Company ka da tyngkheiñ ko ya ka Status Quo kawa da phah da u montri ka chnat ka chait ka khiah.
Ka seiñ JSU lyngba ka kyrwoh na u President ka Shillong Circle u Treiborlang R Suchen da ong wa da yoh yutip leh wa ha ka por wa ki wakreh 108 yong ka Assam ki da yakhih pyrchah ki ya ka GVK ha jylla Assam ym em ka ah tulop ya ki wakreh katwa ha kani ka jylla Meghlaya da man mar dei khangtleiñ.
Ka seiñ ka dawa ko leh ya ka sorkar wa ym toh de wow pynslem wow e ya ka bui (Report) wa da dep yaklam bniah ha ka Special Committee kawa da dep ya chong ha ka 26 tarik u bnai wa da dep ha yung krehkaam u DHS .
Da dawa leh na ka GVK wa toh u pyllait lut hapoh chi tayaw ya ka tulop wa da dep ah na ki wakreh 108 wei lada ym leh ya ini, ka seiñ ym yohsa ko wow tuklar hi noh da ka wow yarap ya ki wakreh 108 kiwa da chah yoohbeiñ ya ka hok kamai ka yong ki.
U Treiborlang R Suchen da ong u leh wa boon ki khynroo khyllood da dooh kyrmen ki wow yoh kaam yoh jam ha ka juk kawa katni wei ini i leh yong ka GVK, da pyndooh kyrmen ko ar chah ya kiwa thooh kaam wei ini daw yah luti ko ya ki khynroo khyllood cha iwa bakla.
Chooh chooh da ong u leh wa ini i leh ka GVK wow ah tulop wow kyrriah kreh ya ki wakreh khlem da booh por da pynyoo yei leh beiñ ya ka hok ki wakreh, kamtæ ka seiñ da dawa ko naka chnat Labour ka sorkar wa toh u leh ki iyi iyi neibynta ini waroh.
Discussion about this post