Ynne ka sngi kawa man ka sngi wa toh u pynman ya ka lai paidbah wa jai-jai namo ka Peace Rally heiyatoh wa i dooh thaw puræ ki khynnah ha ka Class XI. Neiliang kiwa kitkaam ka JYF da yoh ki u yachem wa u Montri Rangbah ka jylla, u Conrad Sangma ha yung krehkaam u Deputy Commissioner, West Jaiñtia Hills.
Ha ini i yachem ka seiñ da ekti ko ya ka dorkhat ha u Montri Rangbah hajrong i wympu yoh thaw puræ ki khynnah.
Hadien ini i yachem neiliang u Montri Rangbah da khana u wa kani man ko ka sien wa nyngkong wa tip u wa em kam ini i chem chitom ki khynnah wei da kular u wow chimkhia smat ya ini i kaam.
Neiliang ka seiñ ryngkat wa ka JSM Western Circle hadien ini i yachem da pynman ki ya ka yalang wa tbian ha Laad College wow pynsñiaw yeini i kular u Montri Rangbah.
Ya kani ka yalang da pynlai da u J. Pala, President ka JYF-EJH heiwa da yoh yei klam na u OL Tariang President JYF (CB), u NR Biam President JSM Western Circle, ka N. Dkhar President JSM Women’s Wing, u O. Nampui President JYF Saipung Circle wa na u N.J. Rymbai President JYF Jowai Circle.
Hadien ka yalang da rai wow kyntu ya ka sorkar wow e yutip deiwa che cha waroh ki khynnah chwa ka 10 tarik uni u bnai wei lada ka sorkar dang boohteiñ ko ya ini i kaam wow pynyoh Admission ya ki khynnah, ka seiñ daw chim ko da kiwi tawon ki luti.
