Ka sorkar Meghalaya ynne ka sngi hawa pynduna ya ka dan yong i Petrol wa Diesel i wow krehkaam nadooh ka 6 tarik uni u bnai heiwa da pynduna ya ka dan i Petrol naka 20% cha ka 13.5% wa naka 12% cha 5% neibynta i Diesel.
Neiliang u Symbood Montri Rangbah, u Prestone Tynsong da pyntip u wa i Petrol ha Byrnihat daw hiar i cha T. 92.38 katwa ha Shillong cha T. 93.91 chi liter. I dor Diesel ha Byrnihat u man i T. 79.41 chi liter katwa ha Shillong won T. 80.75 chi liter.
U Prestone da kdaw u wa i dor Petrol ha Guwahati man i T. 94.58 chi liter katwa i Diesel toh T. 81.29 chi liter.
“I hiar dor i Petrol toh T. 10.95 chi liter ha Byrnihat wa T. 11.08 chi liter ha Shillong, katwa i Diesel da hiar dor T. 16.67 chi liter ha waroh kawi ka jylla Meghalaya,” da ong u Tynsong.
Da pyntip u leh wa i dooh nong ka sorkar na ini i pynhiar dor toh T. 100 klur du ha ki 5 bnai itæ nadooh ka Khongchonglad (Nov) hadooh u Wisu (Mar), 2022.
Da ong u leh wa i pynhiar yei dan i Petrol na 20% cha 13.5% wei yei Diesel ba 12% cha 5% ha Meghalaya da pynman yei dor phñiang iwa duna dooh hapoh ka ri.
U Prestone da pyntip u leh wa ka sorkar chimkhia ko yei wym em ki thaw pynlang phñiang namo ki Fuel Depot hapoh ka jylla wei da yaklam waka Indian Oil Corporation hajrong ini wei manda yoh ya ini, ka sorkar daw ye ko wow pynduna yei dooh nong ha ka dan da 1.5% hadooh 2%.
“Ka chnat Food and Civil Supplies Department da pait ko ya ini yow pyntikna wa chna ya ka Depot wei dang thooh thaw wow leh ya ini ha Ri-Bhoi District,” da ong u Tynsong.
