Ka UDISE+ FORM toh kawi na ki bynta wa emkaam bha wow pyndap da waroh ki skur neibynta wow yoh ki yei tipmit hakhmat ka Ministry of Education yong ka sorkar India kamjooh ha ka chnat krehkaam i puræ puthi yong ka sorkar jylla.
Kamtæ ha ka thong wow man i rukom pyndap ya ki UDISE+ FORM iwa biang wei yahaap katkam watoh u pyndap. Ka yung krehkaam yong ka District Mission Coordinator, SSA West Jaiñtia Hills ha ka sngi Muchai 1 tarik Naitung hei pait i pynlai u District Programmer SSA West Jaintia Hills da pynman ko ya ka yalang e sikai kyrpang wa chi sngi ya ki BRP, CRP, DEO, MIS wa ki IE Volunteer hajrong ki bynta wa yatoh wa ka UDISE.
Ya kani ka e sikai da pynman ha Yung Walieh ka Dorbar Chnong Loompyrdi Iongpiah heiwa u R.L. Bimee Suwer, District Programmer SSA West Jaiñtia Hills da klam da batai bniah u chaphang ki bynta yong ka UDISE.
Chooh chooh hei pynkut ya ka e sikai u B. Suwer, e u leh ka wyrta chula cha waroh ki Headteacher næ ki Principal neibynta wow lait u mih iwon iwon i wit i thut, i bakla (Error) hadien habood, da kyrpaad u ya ki Headteacher næ ki Principal yong waroh ki skur wow man kiwa bniah ha chwa wow pyndap ya kiwon kiwon ki bynta ka UDISE+ FORM. Yooluti u wa dei yakrehlang yong waroh nadooh ki Headteacher/Principal, ki BRP/CRP, DEO, MIS wa kiwi kiwa yatoh bynta, ka District u ye ko u pyndep ya ka UDISE+ hapoh i por wa dabooh wei kawa lait leh neiwon iwon i thut, i bakla kam wajooh man ha ki snem wa dalai.
