15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

E sikai pynsñiawthooh ki bru ka SSA chaphang i lehkhooid

0 Comments
Advertisement ad1
Advertisement ad1

Jowai: I lehkhooid wei puræ puthi toh ki ar tylli ki bynta wa emkaam hei longbru manbru kamtæ ha ka thong wa ka yurim yong kini ki ar tylli ki mat ki bru ka Sarva Shiksha Abhiyan wa em ha West Jaiñtia Hills District dei sñiawkhia da yoohkjat ki ha chnong Sanaro wow pynman ya ka Awareness Programme wa chi sngi.

Ya kani ka prokram da pynman ha yungskur ka Sanaro U.P. School SSA ha ka sngi Pyngkat 3 tarik u Wisu 2020 dei chimkhia ka Perio Dhar, Cluster Resource Person yong ka Mukoh Cluster heiwa ki khynnah skur wa kiwa sikai yong ki skur wa em hapoh ka chnong Sanaro dawan ki wow yachimbynta chirup i sakhilang u waheh chnong u Marbud Phawa.

Ka Perio Dhar, Cluster Resource Person Mukoh Cluster hei e ya ki kyntien yahkhmat hajrong ka thong yong kani ka prokram da e ko i sñiawngooh ya ki khynnah skur wa kiwa sikai kiwa da yachimbynta ha kani ka prokram deiwa kyrpaad leh ya waroh wow yakrehlang ha kiwon kiwon ki bynta yoh u man i thrang i angnood ka sorkar iwa jop.

Kiwi won kiwa da e kyntien ha kani ka prokram toh u Firstbonson Dhar, Head Teacher Sanaro U.P. School SSA wa u Sambha Tyngkan, Cluster Resource Person, Ladthadlaboh. U Sambha Tyngkan hei klam da e mynsien u ya ki khynnah skur wa kiwa sikai deiwa ong, man kiwa kitkhia yei kamram wei ham booh dei sñiaw dooh mynsien, man kiwa yaichah wei deiwa leh kamtæ yooluti wa chisien ka sngi u yoh phi yeitæ i naam i burom.

U S.D. Laloo, DCCM-SSA hei chimbyntalang wow e i klam i kappæ heiyatoh wa kani ka prokram da ong u wa i lehkhooid-lehpliah, i chait i khiah wei puræ puthi toh kiwa emkaam hadooh kattæ hei manbru longbru wei im wa man ka sngi, kamtæ khut kyrpaad u ya ki khynnah skur wa kiwa sikai wow yakrehlang hajrong ka thong yong ka Swachh Bharat-Swachh Vidyalaya dei wow yaleh katwa ye u pynman ya ki soodong sookun ka thaw puræ næ ka skur kawa khooid wapliah wei chooh chooh leh ha ka thong yong ka Right To Education Act, banjoor u ya kiwa sikai næ ki bor pait bor pynlai yong ki skur hapoh ka chnong Sanaro wow bood ryntih ki kat kam wa kdaw ha ka aiñ khnang yow lait u mih iwon iwon i kynrum kynram hadien habood wei heijooh i por yow man ka chnong ka thaw kawa dap da ki khynnah wa tip u thoh u puræ.

Khaddooh chwa wow poi cha ka bynta wakut yong kani ka Prokram neiliang kiwa sikai dei sñiawkhia chimbyntalang ki wow ya phyllu yumut yei eh i khoo wa hap ki u maad u chem heiyatoh wow wanrah yei khooid i pliah yong ki soodong sookun ka skur na ki por cha ki por neidaw wym yoh ya ka um wabiang wow sait u pynkhooid wei em ya ki kynrooh (Boundary Wall) wabiang ki wow yada ya ka skur neibynta wow lait u man ka thaw wa lyngkar wa yoh ki bru næ ki mrad u leh ya ki kaam kiwa man pyrchah yei khooid i pliah ka yung skur waroh kawi.

Share this:
Previous

Pyndep ka Raij Lamin ya ka lehniam Thap Chyieñ

Next

Poi u khñiang COVID-19 ha Bhutan; La 31ngut hapoh India