Ka Sarot I Man, ka seiñ wa em hapoh ka chnong Panaliar, Jowai ynne ka sngi da pynman ko yei e snaam sñiawbha ha Jowai Blood Bank.
Haka yalang tbian chwa wow e snaam kawa da pynlai da u Jait Dao Sumer, dkhot ka Sarot I Man, da pynsñiaw haroh u hajrong i lai luti ka seiñ wei ong u leh wa ha u snem 2021 ha uni hi u jooh u bnai ka seiñ da wan e snaam sñiawbha ko ha kani ka Blood Bank.
Kamtæ najrong wa pynsñiaw u i sñiawngooh yaki dkhot wa jooh mih chakhmat u e snaam sñiawbha wa kynthup ya u Oliver Shadap Passah, u Anthony Challam, u Wombai Sumer, u Kyllimot Lhuid, u Ram Sumer wa ya oo kamjooh, yooluti u wow nang yoh ki yei chait i khiah khnang yow nang ye chooh chooh ki u e yarap snaam neini chakhmat.
Ka Dr. Patricia Shylla, Medical Officer I/c Jowai Blood Bank hawa e yei klam da yaroh ko yaka Sarot I Man wa hanla em ki du kattu katni ngut donhi leh, tangwa ki kaam yong ki man i iwa khroo neibhah wa ka snaam toh kawa kordor tam hei im u bru.
Neitæ hawa klam pynche yaki kyndon wa hap u bood ryntih hawa e snaam, ong haroh ko wa i wan chakhmat wow e snaam yarap ko u pynyoh i doh i pran wa chait wa khiah neibhah man ko kamwa pynkhooid yei snaam.
Kyntu haroh ko wow bood yaka nongmuna yong ka Sarot I Man wow man kam ki Voluntary Blood Donors, neibhah da ye ko u pynlait im ya chiboon ki bru wa emkaam snaam. Heijooh i por chim haroh ko yaka laad u pynche hajrong ka kjut HIV/AIDS.
Neiliang u A. War, dkhot ka Sarot i Man ong u wa ka snaam toh ka bynta wa kongsan ha u bru neibhah i lai i snaam namo ka Blood Circulation yarap ko u wanrah Oxygen hei doh i pran u bru, wei hanla u bru da tip lut u haka Science & Technology tangwa yei snaam won ym pu ye u wow chna lane wow dai cha Pharmacy. Ong haroh u hanla ka sorkar da pyrchang thooh ko boon ki laad u yada yei kjut boonjait ha u bru deiwa pynbiang ki dawai dapon haki thaw e sumaar tangwa kynmoo wa i snaam man i iwa kordor tam.
