Jowai: Ka Jingiaseng Samla Balang Katholik Mihmyntdu, West Jaiñtia Hills District haka sien wa nyngkong da mih ko chakhmat wow e snam sñiawbha cha ka Blood Bank Jowai ynne ka sngi iwa man chibynta kam i yarap yong ki yaki para mynsien bru kiwa emkaam snam hei kjut i chitom.
Hawa kylli yei daw wa pynman yaki u mih chakhmat, ka Adviser yong kani ka Jingiaseng Samla ka Aiti Mawlong da ong ko, “Kam ka Adviser iwa pynman ya nga u pynchlur yaki khon khynroo u e snam sñiawbha ki toh hadien wa da maad yei emkaam snam pyn ha yung heiwa wym ye i wow e kylliang yei snam, wei nadooh itæ i por sdang O u sñiawthooh wa kani toh ka kaam wa khroo tam u leh neibynta ka imlang sahlang kamjooh yaki bru kiwa emkaam snam”.
“Hanla nga wym em biang i bor yong i doh i pran wow e snam leh, tangwa emkaam won u pynsñiawthooh ya kiwi, kamtæ hajrong kani ka yurim da e yumut O yaki khon khynroo ka Balang wow mih chakhmat neibynta u e snam sñiawbha,” ong ka Aiti Mawlong.
Da pynchlur haroh ko ya kiwi won ki khon khynroo wow e snam ki cha ki Blood Bank waphær waphær khamtam dei wow e sñiawbha, neibhah waka snam man ko kawa kordor hanlada em yaka spah ka phaw leh wym ye u pynim yei mynsien chisien wa u bru emkaam u yei snam.
Neiliang ka Dr. P. Shylla In-charge Jowai Blood Bank hawa klam haka yalang tbian chwa u sdang i e snam, da pynsñiaw ko i sñiawngooh wa khroo yaka Jingiaseng Samla Balang Katholic Mihmyntdu kiwa wot hapyrdi i chong si’er ka imlang sahlang neidaw ka khlam COVID-19 leh da toor bait ki chakhmat u e yarap ya kani ka Blood Bank kawa em katni hapyrdi i kyrdooh snam, neibhah wa nadooh wym em de man chngaaiñ ka imlang sahlang da duna bha ki seiñ næ ki bru samen wa wan e snam sñiawbha.
Heijooh i por da batai haroh ko hajrong ki le jait ki rukom e snam wa kynthup yaka Replacement Donors (kawa e salan da kiwa yoh snam), Voluntary Blood Doners (kiwa e sñiawbha) waka Professional Doners (kiwa chim dei dor iwa da khang da ka aiñ).
Neitæ da pynche haroh ko yei rta wa kamjooh i man i long yong i doh i pran ki bru kiwa ye u e snam.
Ha kani ka sngi da emlang haroh ka A. Laloo, Asst. Director Blood Safety yong ka Meghalaya Aids Control Society Shillong wa kiwi kiwi.
