Jowai: Kam chibynta wow e yarap ya para bru wa emkaam snam hawa kjut wa chitom kiwa da jan dooh yei mynsien, ynnin ka 5 tarik neiliang ka Cleanliness Health and Sanitation Committee yong ka Kiang Nangbah Government College, Jowai, deiwa ya krehlang waka Blood Bank Jowai da pynman ki ya ka pynsñiawthooh hajrong i emkaam yei e sñiawbha yei snam haka yalang kawa pynman ha Auditorium kani hi ka College, wei da emlang ka Dr. P. Shylla I/C Blood Bank Jowai Civil Hospital, u Principal ka Kiang Nangbah Government College, u S. Dey kiwa lai puræ, kiwa sikai wa kiwi.
Haka yalang da pynsñiawthooh yei emkaam wow e snam sñiawbha kawa man kawa kordor hadooh kattæ kattæ neibhah wa ye u yada yei im yong uwon uwon wei i snam wa e sñiawbha ym lai ko du cha kiwa ha yung ha sem, wot cha kitu kiwa ym tipmit.
Hadien ka yalang pynsñiawthooh da pynman yaka e snam wei da wan chakhmat da kiwa lai puræ wa kiwa sikai. Na ki 16 ngut kiwa wan chakhmat da hoi 13 ngut wow e snam.
Discussion about this post