Hajrong ka thong yong ka World No Tobacco Day 2024 ka wow man haka 31 tarik Naisan, ka yung krehkaam i puræ puthi yong ka jylla deilang waka National Health Mission, Tobacco Control Cell da pynman ki yaka yalang wa kyrpang neibynta ki khynnah skur wa tip kam ka “Walk for My Meghalaya-Tobacco Free Meghalaya”.
Ha West Jaiñtia Hills District ha kini ki sngi da yoo yei mih yachimbynta ki khynnah skur deilang kiwa sikai wow lai uiñ sarok deiwa rah leh yaki dur wa thoh yaki kyntien kit yumut hajrong i sih yong u sikret, biri, duma wei da ya chimbynta ki khynnah skur haka Poster Wall næ i biah yaki dur wa da dro da ki khynnah ha man ki thaw paidbah.
Ha chnong Jowai katkam ka hukum naka yung krehkaam u Director ka State Project Director SSA & Director of School Education & Literacy, Meghalaya, ki skur kiwa da mih sarok wow pynman ya kani ka lai paidbah toh ka Seiñraij Higher Secondary School, Jowai, Seiñraij UPS, Seiñraij Govt. LPS, Panaliar Secondary School, Jowai, Panaliar UPS SSA, Panaliar Govt. LPS, Panaliar English School, Jowai waka Welcome Gayang Memorial School, Jowai.
Kani ka pynsñiawthooh da man ko leh hei dur ka yakob hapyrdi ki skur wa kynthup ki Lower Primary, Upper Primary, Secondary wa Higher Secondary Level wei ka wow man nadooh na Block Level, District Level waka State Level heiwa ka tarik wa khaddooh yong kani ka yakob u kut ko haka 20 tarik uni u bnai.
Discussion about this post