Kawi ka manbei kawa tip kam ka Jennifer Chyrmang kawa chong ba sah ha Khliehriat West, East Jaiñtia Hills District ym yohsa de ko wow lai paan yarap na ka seiñ FKJGP Khliehriat Circle kamjooh leh na ka One Stop Center wa em ha Khliehriat hajrong i chah ieh beiñ ko ha u kurim uwa wa da emlang ki 3 ngut ki khon.
Katai ka manbei da pyntip ko wa u kurim yong ka uwa tip kam u Kobin Nongtdu uwa chong wa sah ha ka chnong Byndihati da ieh beiñ u ka deilang wa le ngut ki khon khlem da e de iwon iwon i yarap, najrong wa man ki kiwa dooh wa duk, kamjooh leh wa man ko ka manbei wym ye u kreh mylla neibhah wa waroh ki khon dang hap wow sumaar ya ki.
Kamwa man katni, kani ka manbei da pyntip ko wa da yang bait ko ya uni u kurim wow wan e yarap ya ka manyung tangwa hadooh katni la kamwa 8 bnai ym em de wan e yarap ya ka manyung wei kani ka manbei da em ko hei eh wa khroo wow pyndap pynbiang yeiwa emkaam yong ki khun wa kiwi de iwa emkaam ha yung ha sem.
Da pyntip leh wa kamwa man kattæ da yoh yei kyrchaan na ka seiñ FKJGP Khliehriat Circle kawa da paan wei da kyntu leh ya ki bor wa toh u pait yong ka Social Welfare wow leh smat ya i kaam katkam i ujor kani ka manbei cha ka chnat krehkaam ka sorkar.
Neiliang kiwa yahkhmat ka FKJGP Khliehriat Circle mar ya tip yeini i eh kani ka manbei, da e yarap wei da booh ujor ko ha ka One Stop Centre ka Social Welfare hawa yatoh wa ini i jia, wei da e khublei ya ka One Stop Centre neibhah wa kitkhia ki hajrong katai ka kaam wot hadooh wow pynpoi ya ini cha ki bor yong ka yung bichaar wei katkam wa pynbaad katai ka manbei, u kurim ko da klam kob u ya ka deiwa ong wa lada lai ko cha ka aiñ lane ki bor ka yung bichaar leh ym tieñ u wei daw pynemkaam daka spah yong oo wow jop ya ka neibhah du kiwa em spah wa jop ya ka mukotduma hapoh ka yung bichaar deiwa kob leh wa iyi u ye ko wow leh ya oo neidaw wa ka toh kawa dooh wa duk.
Kiwa yahkhmat ka seiñ kiwa emlang kynthup ya u Vice President u Wanki Lyngdoh, General Secretary u Fullmoon Nongtdu wa kiwi da ong ki leh wa neiling yong ka seiñ da yarap ko ya kani ka manbei da ka poisa katwa ye wei da kyrpaad leh ya kiwi ki para seiñ wa kiwi wow yarap ya kani ka manbei kawa chem chitom chem jynjar neibha wa kani ka manbei ym ye de ko wow thooh kreh neibhah wa waroh ki khon da yoh ko deiwa chah pooid wei ka seiñ ka kyrpaad ko leh ya ka yungbichaar wow pyndep smat ya ka mukotduma khnang wow yoh yarap smat yow yoh ko yei hok.
Ka seiñ da maham ko leh ya kiwi ki manpa kiwa jooh ieh beiñ wei pynsih ya ki khynnah kynthai yong ka jaitbru wei ym toh wow leh ya kam kini ki jait kaam wei ka seiñ ym chong klikti hawa yatoh wa ka mukotduma yong ka Jennifer wei daw booddien hadooh wa yoh yei hok, pynkut ka kyrwoh naka seiñ FKJGP Khliehriat Circle.
