Ka HYC-Padu Unit ynne ka sngi da e yarap ko da ki marbaam cha ki kattu katni tylli ki manyung wa dooh wa duk kiwa em hapoh u pood u ang ka chnong Padu.
Ha kani ka sngi da ya emlang leh u Dr. A. Khonglah uwa pait ya ka Padu State Dispensary, u General Secretary ka Circle u Tohmondiam Mukhim kamjooh u President ka Unit u Dikermi Mukhim wa ki dkhot ka seiñ.
Neiliang u Dr. Khonglah da e u ya ki kyntien yaroh ya ka seiñ ya ki kaam wa bha yong ka. Wei da kyntu u leh ya ki paidbah wow man ki kiwa syndong ha kam kini ki por wa ka ri kamjooh waroh kawi ka pyrthai dang yakhun ki ya ka khlam COVID-19.
Neiliang won u President ka HYC Padu Unit u Dikermi Mukhim da ong u wa hadien wa ka seiñ da pait bha ki ya ki manyung wa dooh wa duk kiwa chem yei eh ha kam kini ki por wa em i khangsbak hapoh ka jylla, da thooh ki ya ki laad ki luti wow yoh e yarap cha kiwa emkaam yarap.
